मलाला सेलिब्रेशन मूडमध्ये! मिळवली ऑक्सफर्ड डिग्री

इस्लामाबाद: पाकिस्तानातील शिक्षण चळवळीतील कार्यकर्ती आणि नोबेलविजेती मलाला युसफजाई ही सध्या सेलिब्रेशन मूडमध्ये आहे. तिने शुक्रवारी सोशल मीडियावर आपला हा आनंद व्यक्त केला आहे. तिने ऑक्सफर्ड विद्यापीठातून फिलॉसॉफी, पॉलिटिक्स आणि इकॉनॉमिक्स विषयातील पदवी अभ्यासक्रम यशस्वीरित्या पूर्ण केला आहे. मुलींच्या शिक्षणाला विरोध करणाऱ्या कडव्या तालिबान्यांच्या गोळीने जेव्हा थेट लहानग्या मलालाच्या डोक्याचा वेध घेतला तेव्हा हा चेहरा जगासमोर आला. स्वात खोऱ्यातील शाळेत जाणारी ही चिमुरडी ब्लॉगच्या माध्यमातून पाकिस्तानातील मुलींच्या शिक्षणाआड येणारा दहशतवादाचा भेसूर चेहरा बेधडकपणे जगासमोर आणत होता. ती इतकी निडर होती की तिने तालिबान्यांच्या गोळीलाही भीक घातली नाही. डिग्री मिळाल्यानंतर मलालाने ट्विटरवरून एक छायाचित्र पोस्ट केलं आहे. आपल्या कुटुंबियांसमवेत केक कापून सेलिब्रेशन करत असतानाचं हे छायाचित्र आहे. तिने या पोस्टसोबत तिच्या भावनाही शब्दबद्ध केल्या आहेत. ती लिहिते, 'ऑक्सफर्ड विद्यापीठाची फिलॉसॉफी, पॉलिटिक्स आणि इकॉनॉमिक्सचा पदवी अभ्यासक्रम पूर्ण करताना मला खूप आनंद होत आहे. पुढे काय करणार हे माहित नाही. पण सध्यातरी नेटफ्लिक्स, वाचन आणि झोप हा माझा कार्यक्रम आहे.' मलालाने तिचं ग्रॅज्युएशन पूर्ण होत असल्यासंदर्भातली पोस्ट ८ जून रोजी शेअर केली होती. तिला अजून चार परीक्षा द्यायच्या आहेत, असंही तिने म्हटलं होतं.

from Career News in Marathi: Career News, मराठी Career बातम्या | Maharashtra Times https://ift.tt/3eeIlzu
via IFTTT