गुगलच्या सीईओंनी २०२० ग्रॅज्युएट्सना दिला कानमंत्र

inspirational message to students of year 2020: २०२० हे वर्ष अडचणींनी भरलेले आहे. जगात करोना विषाणूमुळे निर्माण झालेली परिस्थिती भयावह आहे. परंतु तरीही संपूर्ण जग हे एका दुर्दम्य आशावादाने या संकटाचा सामना करत आहे. असाच आशावाद बाळगून यंदा पदवी घेऊन बाहेर पडणाऱ्या तरुण-तरुणींना गुगलचे मुख्य कार्यकारी अधिकारी यांनी कानमंत्र दिला आहे. यू ट्यूबने आयोजित केलेल्या एका ऑनलाइन कार्यक्रमात, पिचई यांनी या वर्षी पदवी पूर्ण करणार्या जगभरातील विद्यार्थ्यांना उत्कृष्ट संदेश दिला आहे. या कार्यक्रमास अमेरिकेचे माजी अध्यक्ष बराक ओबामा, माजी फर्स्ट लेडी मिशेल ओबामा, प्रसिद्ध गायक बियॉन्स, लेडी गागा यांच्यासह अनेक सेलिब्रिटींनी हजेरी लावली होती. सुंदर पिचई यांचे ते भाषण आम्ही त्यांच्याच शब्दांत येथे देत आहोत - 'मला वाटत नाही की तुम्ही अशा पद्धतीच्या पदवीदान समारंभाचा कधी विचारही केला असेल. मिळालेल्या ज्ञानाचं सेलिब्रेशन करायची खरं तर ही वेळ. पण आपण काय कमावलं आणि काय गमावलं याचा हिशेब आताच तुमच्या मनात सुरू झाला आहे. तुमचे प्लान्स, जॉब्स, आयुष्यातला हा स्वत:च्या हिंमतीवर उभं राहण्याचा सुंदर अनुभव मिळण्याची तुम्हाला प्रतीक्षा होती. पण परिस्थिती नेमकी याच वेळी बिकट व्हावी... पण हीच वेळ आहे मेंदूचे सारे दरवाजे उघडण्याची. आशा, उमेद कायम ठेवण्याची. तुम्ही हे कराल तर इतिहास २०२० ची बॅच कायम लक्षात ठेवेल. तुम्ही काही गमावलं म्हणून नव्हे तर तुम्ही काय बदललं याची नोंद इतिहास ठेवेल. हीच संधी आहे तुमच्याकडे. सर्व काही बदलण्याची आणि मला आशा आहे, तुम्ही हे नक्की कराल. आपला इतिहास आपल्याला आशावादी राहण्याची आणि कोणत्याही परिस्थितीत खचून न जाण्याची शिकवण देतो. १९२० ने देखील असाच एका घातक महामारीचा अंत पाहिला आहे. १९७० ने व्हिएतनाम युद्ध पाहिलंय. २००१ च्या विद्यार्थ्यांनी पाहिलाय ९/११ चा अमेरिकेवरील दहशतवादी हल्ला. दरवर्षी त्या वर्षी पदवीधर होणाऱ्या विद्यार्थ्यांनी काहीतरी बदललेच आहे. म्हणून आशा सोडू नका. एक पिढी जेव्हा पुढे सरकते तेव्हा ती दुसर्‍यासाठी आधार बनवत असते. या आधारावर नवीन शक्यता असतात, त्या पडताळून पाहण्यासाठी नव्या लोकांची गरज असते. टेक्नॉलॉजीशी संबंधित अनेक गोष्टी तुम्हाला कदाचित निराश करतील, नवं शोधण्यासाठी उतावीळ करतील. पण ते नैराश्य, उतावळेपण आणि उत्सुकता गमावू नका. तुमची हीच उत्सुकता तंत्रज्ञानाच्या क्षेत्रात नवी क्रांती घडवेल आणि तुमच्या हातून असं काही घडेल ज्याचा आपल्या पिढीने कधी विचारही केला नसेल. सर्वात महत्त्वाची गोष्ट आहे ती बुद्धीची कवाडं खुली करण्याची. जेणेकरून तुम्ही तुमची आवडती गोष्ट शोधू शकाल. अशी गोष्ट करा जी जगात तुम्हाला सर्वाधिक प्रेरणा देते. तुमचे पालक सांगतात म्हणून, मित्र करताहेत म्हणून किंवा समाज तुमच्याकडून जे करण्याची अपेक्षा ठेवतो, ते करू नका. मी स्टॅनफोर्डला जाऊन शिकावं म्हणून माझ्या वडिलांनी माझ्यासाठी अमेरिकन फ्लाइटची तिकिटं खरेदी करण्यासाठी त्यांचा एक वर्षाचा पगार गुंतविला होता. तो माझा पहिला विमानप्रवास होता. नशीबाव्यतिरिक्त आणखी ज्या गोष्टीमुळे मी इथवर पोहोचलो, ती म्हणजे तंत्रज्ञानाप्रती असलेली जिज्ञासा आणि अर्थात.. बुद्धीची मोकळी कवाडं.

from Career News in Marathi: Career News, मराठी Career बातम्या | Maharashtra Times https://ift.tt/2AMfbsJ
via IFTTT