महाराष्ट्रातल्या 'या' दोन जिल्ह्यातल्या शाळा सुरू

Maharashtra Schools Reopening: करोना संक्रमणामुळे देशात पुकारलेल्या लॉकडाऊननंतर सुमारे चार ते पाच महिन्यांनी राज्याच्या दोन जिल्ह्यांमधील सुमारे १९० शाळा या आठवड्यात उघडत आहेत. इयत्ता नववी, दहावी आणि बारावीचे वर्ग उघडण्यात आले आहेत. हे वर्ग उघडताना आवश्यक ती सर्व खबरदारी घेऊन स्टॅंडिग ऑपरेटिंग प्रोसिजरच्या सर्व नियमांचं पालन करण्यात आलं आहे. राज्याच्या SOP नुसार, ज्या जिल्ह्यात कोविड १९ संक्रमित एकही रुग्ण नाही तेथे इयत्ता नववी आणि त्यापुढील वर्ग सुरु करता येतील. वर्ग सुरू करण्यासाठी शाळांनी सोशल डिस्टन्सिंग आणि हायजिनचे नियम तर पाळायचे आहेतच शिवाय विद्यार्थ्यांनाही त्यांचा सराव करून घ्यायचा आहे. शिक्षण विभागातील अधिकाऱ्यांनी दिलेल्या माहितीनुसार, चंद्रपूरमधील सुमारे २० शाळा सुरू झाल्या आहेत. अशाच प्रकारे गडचिरोली जिल्ह्यातील १,४९७ शाळांपैकी १७० शाळा सुरू झाल्या आहेत. हे दोन जिल्हे वगळता राज्यात अन्यत्र कुठेही ऑफलाइन वर्ग म्हणजेच प्रत्यक्ष शाळा सुरू झालेल्या नाहीत. शाळा प्रमुखांनी गेले दोन आठवडे शाळा सुरू करण्याची तयारी सुरू केली आहे. पालकांशी संवाद साधला आहे. नेहरु विद्यालय या चंद्रपूरमधील शेगाव येथील मराठी माध्यमाच्या अनुदानित शाळेचे प्रमुख विनोद काहुर्के म्हणाले, 'आम्ही २६ जूनपासून काम सुरू केले, पालक आणि शाळा व्यवस्थापन समितीच्या बैठका घेतल्या. आम्ही पालकांना सांगितलं की त्यांना त्यांच्या मुलांना शाळेत पाठवणं सुरक्षित वाटत असेल तरच शाळेत पाठवा. ग्राम पंचायतीच्या मदतीने आम्ही शाळा आणि परिसर निर्जंतुक केला आणि तसं प्रमाणपत्र घेतलं. सॅनिटायझर्स आणि हँडवॉश शाळेच्या फंडातून विकत घेतले. वर्गखोल्यांची रचना सोशल डिस्टन्सिंगच्या नियमानुसार बदलली.' या गावची लोकसंख्या सुमारे सात हजार आहे आणि येथे कोविड - १९ संक्रमित एकही रुग्ण नाही. या शाळा ६ जुलै पासून सुरू झाल्या आहेत. दोन बॅचमध्ये मुलांची विभागणी केली आहे. प्रत्येक बॅच एक दिवसाआड शाळेत येते. प्रत्येक बेंचवर एकच विद्यार्थी बसतो. शिक्षकांना दोन्ही वर्गांना एक विषय दोन वेळा शिकवावा लागतो. जे अजूनही शाळेत येत नाहीएत त्या विद्यार्थ्यांना या वर्गांचे रेकॉर्डेड व्हिडिओ पाठवले जातात किंवा वर्ग सुरू असताना ते झूम वा गुगल मीट्स द्वारे कनेक्ट होतात, अशी माहितीही काहुर्के यांनी दिली.

from Career News in Marathi: Career News, मराठी Career बातम्या | Maharashtra Times https://ift.tt/2Zfsk7p
via IFTTT