डिप्लोमा प्रवेशांसाठी अर्ज करण्याचा आजचा अखेरचा दिवस

बारावीनंतर फार्मसी, हॉटेल मॅनेजमेंट आणि केटरिंग यासह अन्य विषयांतील पदविका अभ्यासक्रमांच्या प्रवेशांसाठी अर्ज करण्यासाठी आज २५ ऑगस्ट हा अखेरचा दिवस आहे. ज्या विद्यार्थ्यांनी अद्याप डिप्लोमा अभ्यासक्रमांसाठी अर्ज भरलेला नाही त्यांना आज अखेरची संधी आहे. तंत्रशिक्षण संचालनालयाने दिलेल्या वेळापत्रकानुसार १० ऑगस्ट ते २५ ऑगस्ट या कालवधीत ऑनलाइन अर्ज करण्याची प्रक्रिया सुरु राहणार आहे. पहिली गुणवत्ता यादी २८ ऑगस्ट रोजी जाहीर होणार आहे. विद्यार्थ्यांना गुणवत्ता यादीबाबत काही आक्षेप असतील तर ते नोंदवण्यासाठी २९ ते ३१ ऑगस्ट पर्यंतचा कालावधी आहे. अंतिम गुणवत्ता यादी २ सप्टेंबर २०२० रोजी जाहीर होणार आहे. अर्ज कसा करायचा? - अर्ज करण्याच्या थेट लिंकवर जा - रजिस्ट्रेशन पर्यायावर क्लिक करा - अर्ज भरून आवश्यक ती कागदपत्रे अपलोड करा - ऑनलाइन शुल्क भरा आणि पावती क्रमांक नोंदवून ठेवा - भरलेल्या अर्जाची प्रत भविष्यातील संदर्भासाठी डाऊनलोड करून ठेवा विद्यार्थ्यांच्या सोयींसाठी राज्यामध्ये अभियांत्रिकी पदविका प्रवेशासाठी ३३६ सुविधा केंद्रांची व बारावीनंतरच्या पदविका अभ्यासक्रमांसाठी २४२ सुविधा केंद्रांची निवड केलेली आहे. ही सर्व प्रवेश प्रक्रिया ऑनलाइन पद्धतीने राबवली जात आहे. अशी आहे प्रवेश प्रक्रिया - प्रवेशाचे सविस्तर वेळापत्रक तंत्रशिक्षण संचालनालयाच्या https://ift.tt/1hUEXHV या संकेतस्थळावर प्रसिद्ध करण्यात आले आहे. - कोविड-१९च्या पार्श्वभूमीवर तंत्रशिक्षण संचालनालय, कागदपत्रांच्या प्रत्यक्ष छाननी प्रक्रियेव्यतिरिक्त ई-स्क्रुटिनीची संकल्पना राबविणार आहे. ऑनलाइन अर्ज भरणे व निश्चित करणे याकरिता उमेदवार त्यांच्या सोयीनुसार छाननीची पद्धत निवडू शकतील. किती जागा? - शैक्षणिक वर्ष २०२०-२१साठी दहावीनंतरच्या प्रथम वर्ष पदविका अभियांत्रिकी अभ्यासक्रमांकरिता ४२ शासकीय संस्थांमध्ये १७,७६४ जागा, १७ अशासकीय अनुदानित संस्थांमध्ये ४,४०० जागा व ३२० खासगी विनाअनुदानित संस्थांमध्ये ८४,९८१ जागा अशा एकूण ३७९ संस्थांमध्ये १,०७,१४५ जागा उपलब्ध आहेत. विद्यार्थ्यांसाठी दोन पर्याय - पर्याय १ :- उमेदवार ऑनलाइन नोंदणी करून "ई-स्क्रुटिनी" पर्याय निवडू शकतील. या पद्धतीमध्ये उमेदवार कोणत्याही ठिकाणाहून इंटरनेटशी जोडलेल्या कोणत्याही कम्प्युटरवरून अथवा मोबाइलवरून (स्मार्टफोन) ऑनलाइन अर्ज भरतील आणि जमा करतील व आवश्यक कागदपत्रे अपलोड करतील तसेच, उमेदवाराला अर्जाच्या पडताळणीसाठी व निश्चितीसाठी कोठेही प्रत्यक्ष जाण्याची आवश्यकता नाही. उमेदवाराचा अर्ज व कागदपत्रे सुविधा केंद्राद्वारे (एफसीद्वारे) पडताळले जातील व निश्चित केले जातील. पर्याय २ :- उमेदवार मोबाइलवरून (स्मार्टफोन) अथवा कम्प्युटरवरून ऑनलाइन नोंदणी करून "प्रत्यक्ष स्क्रुटिनी" पद्धतीचा पर्याय निवडू शकतील. ज्या उमेदवारांकडे संगणक अथवा मोबाइल (स्मार्टफोन) इत्यादी सुविधा नाहीत असे उमेदवार त्यांच्या सर्वात जवळच्या सुविधा केंद्रावर जाऊन ऑनलाइन नोंदणी व सोयीस्कर वेळ ठरवण्यासाठी जाऊ शकतील. ही प्रक्रिया सुविधा केंद्रावर निशुल्क आहे. उमेदवारांनी त्यांना नेमून दिलेल्या वेळेत सुविधा केंद्रावर उपस्थित राहून व सामाजिक अंतर नियमांचे पालन करून अर्जपडताळणी व त्याची निश्चिती करणे अशा प्रक्रिया नि:शुल्क पार पाडणे आवश्यक आहे.

from Career News in Marathi: Career News, मराठी Career बातम्या | Maharashtra Times https://ift.tt/2YyYmue
via IFTTT