भारतात 'वर्क फ्रॉम होम' प्रकारच्या नोकऱ्यांमध्ये वाढ: सर्वेक्षण

नोकऱ्यांच्या दृष्टीने खरंतर हा काळ फार समाधानकारक नाही. मात्र करोना आणि त्यानंतरच्या लॉकडाऊनमुळे एकीकडे मोठ्या प्रमाणावर नोकऱ्या जात असताना दुसरीकडे 'वर्क फ्रॉम होम' पद्धतीच्या नोकऱ्यांचे प्रमाण वाढले आहे. कोविडच्या आधीच्या काळाच्या तुलनेत अनेक कंपन्या आता वर्क फ्रॉम होम प्रकारच्या नोकऱ्यांना प्राधान्य देताना दिसत आहेत. एका सर्वेक्षणातून ही बाब पुढे आली आहे. वर्क फ्रॉम होम प्रकारच्या नोकऱ्या नोकरदारांनाही खूप जास्त सोयीच्या, लवचिक वाटत आहेत. वैयक्तिक आणि व्यावसायिक आयुष्याची योग्य सांगड घालायला 'वर्क फ्रॉम होम' मदत करतं. शिवाय प्रवासाचा वेळ आणि दगदगही वाचते. त्यामुळे गेल्या काही महिन्यात वर्क-फ्रॉम-होम जॉबमध्ये वाढ झाली आहे, असे हे सर्वेक्षण सांगते. या जॉब पोर्टलने हा सर्व्हे केला आहे. 'रिमोट जॉब्स देण्याचे प्रमाण कोविडपूर्वीच्या काळापेक्षा आता तीन पटीने वाढले आहेत,' असं हे सर्वेक्षण सांगतं. वर्क फ्रॉम होम नोकऱ्यांची संख्याही २०२० मध्ये २०१९ च्या तुलनेने चारपट वाढली आहे. नोकरी डॉट कॉम या पोर्टलवर गेल्या पाच महिन्यात 'वर्क फ्रॉम होम' हे शब्द सर्वाधिक सर्च झालेल्या पहिल्या तीन शब्दांमध्ये आहेत. 'सेल्स / बिझनेस डेव्हलपमेंट आणि कस्टमर केअर एजंट्ससारखे पारंपरिक ऑफिस बेस्ड जॉबही आता वर्क फ्रॉम होम पर्यायाने ऑफर करण्यात येत आहेत,' अशी माहीती नोकरी डॉट कॉमचे मुख्य उद्योग अधिकारी पवन गोयल यांनी दिली. वर्क फ्रॉम होम प्रकारातील या जॉबपैकी निम्म्या नोकऱ्या बीपीओ आणि आय टी क्षेत्रातून ऑफर होत आहेत. तर उर्वरित नोकऱ्यांपैकी अर्ध्या आयटी सॉफ्टवेअर, शिक्षण-अध्यापन आणि ई कॉमर्स क्षेत्रातील आहेत. अनेक वेबिनार्समध्येही वर्क फ्रॉम होम विषयावर उद्योग क्षेत्रातली तज्ज्ञांकडून साधकबाधक चर्चा होताना दिसत आहेत.

from Career News in Marathi: Career News, मराठी Career बातम्या | Maharashtra Times https://ift.tt/2FNTU4i
via IFTTT