जास्त परीक्षा केंद्र, प्रत्येक वर्गात कमीत कमी विद्यार्थी; JEE, NEET साठी NTA ची तयारी

JEE Main : सर्वोच्च न्यायालयाने हिरवा कंदिल दाखवल्यानंतर नॅशनल टेस्टिंग एजन्सीने जॉइंट एन्ट्रन्स एक्झाम (JEE) आणि नॅशनल एलिजिबीलिटी कम एन्ट्रन्स टेस्ट (NEET) च्या आयोजनाची तयारी सुरू केली आहे. जास्तीत जास्त परीक्षा केंद्र, एका वर्गात कमीत कमी विद्यार्थी, प्रवेशद्वारावर आरोग्यदृष्ट्या काटेकोर तपासणी आणि काळजी अशी योजना आहे. जेईई मेन परीक्षा १ ते ६ सप्टेंबर तर नीट परीक्षा १३ सप्टेंबर रोजी होणार आहे. जेईई मेनसाठी देशभरात ९ लाख ५३ हजार विद्यार्थी बसले आहेत. १५ लाख ९७ हजार विद्यार्थ्यांनी नीट परीक्षेसाठी नोंदणी केली आहे. कोविड - १९ महामारीच्या पार्श्वभूमीवर परीक्षेला उपस्थित राहणाऱ्या विद्यार्थ्यांच्या आणि अन्य कर्मचाऱ्यांच्या आरोग्याच्या दृष्टीने सर्व खबरदारीचे उपाय योजण्यात येणार असल्याचं एनटीएने स्पष्ट केलं आहे. 'जेईई मेनसाठी परीक्षा केंद्रांच्या संख्येत वाढ करण्यात आली आहे. आधी ५७० परीक्षा केंद्रे होती, ती आता ६६० करण्यात आली आहेत. नीटसाठी देखील परीक्षा केंद्रांची संख्या २,५४६ वरून वाढवून ३,८४३ करण्यात आली आहेत. जेईई ही संगणकीकृत परीक्षा असून नीट ही पेन-पेपर परीक्षा आहे,' अशी माहिती एनटीएने प्रसारित केलेल्या निवेदनात देण्यात आली आहे. जेईई मेन परीक्षेला प्रति सत्र विद्यार्थी संख्या कमी करण्यात आली आहे. आधी प्रति सत्र १ लाख ३२ हजार विद्यार्थी देशभरात या परीक्षेला एका वेळी बसवण्यात येणार होते. ही संख्या आता कमी करून ८० हजारांवर आणण्यात आली आहे. परिणामी सत्रांची संख्या ८ वरून १२ पर्यंत वाढवण्यात आली आहे. नीटसाठी एका वर्गात बारा विद्यार्थी प्रत्येक वर्गात बसणाऱ्या विद्यार्थ्यांची संख्याही घटवण्यात आली आहे. जेईई मेन्ससाठी विद्यार्थी एक जागा सोडून बसतील तर नीटसाठी प्रत्येक वर्गात आता बाराच विद्यार्थी बसतील, आधी ही संख्या २४ होती. परीक्षा केंद्राबाहेर प्रतीक्षा करणाऱ्या विद्यार्थ्यांनाही सोशल डिस्टन्सिंग पाळता येईल अशा पद्धतीने व्यवस्था करण्यात येणार आहे. दरम्यान, या दोन्ही परीक्षा पुढे ढकलण्यात याव्यात अशी मागणी अजूनही विद्यार्थी-पालकांकडून होत आहे. अनेक राजकीय नेत्यांनीही कोविड काळात या परीक्षा घेण्यास विरोध दर्शवला आहे.

from Career News in Marathi: Career News, मराठी Career बातम्या | Maharashtra Times https://ift.tt/32nU9Li
via IFTTT