आता MBBS नंतर करता येईल २ वर्षांचा डिप्लोमा

PG Diploma in Medical: एमबीबीएस अभ्यासक्रम पूर्ण केलेल्या किंवा करत असलेल्या विद्यार्थ्यांसाठी एक चांगली बातमी आहे. जर तुम्हाला एमबीबीएसनंतर पीजी डिग्री कोर्स करायचा नसेल किंवा करणं शक्य नसेल तर तुमच्याकडे आता पीजी डिप्लोमाचा देखील पर्याय आहे. केंद्र सरकार आणि मेडिकल काउन्सिल ऑफ इंडियाने याला मंजूरी दिली आहे. यासंबंधी केंद्रीय आरोग्य आणि कुटुंब कल्याण मंत्रालयाने ६ ऑगस्टला एक अधिसूचना देखील जारी केली होती. यात नॅशनल बोर्ड ऑफ एक्झामिनेशन (NBE) अंतर्गत आठ वैद्यकीय शाखांमध्ये पीजी डिप्लोमा अभ्यासक्रम सुरू करण्याविषयी नमूद करण्यात आले आहे. गुरुवारी २० ऑगस्ट रोजी देशभरातील वैद्यकीय तज्ज्ञांचे एक वेबिनार आयोजित करण्यात आले होते. यात या तज्ज्ञांनी या निर्णयाचे कौतुक केले. मेडिकल क्षेत्रात यामुळे मोठी सुधारणा होईल असं देशातील नामांकित डॉक्टरांनाही वाटतं. डॉक्टरांचे म्हणणे आहे की देशात पीजी मेडिकलच्या सुमारे ५० हजार जागा आहेत. यासाठी १ लाख ७० हजारांहून जास्त डॉक्टर अर्ज करतात. आता पीजी डिप्लोमा कोर्स सुरू झाल्यानंतर लाखो डॉक्टरांना मेडिकलमधील उच्च शिक्षण घेण्याची संधी मिळेल. विशेषत: ग्रामीण भागात स्पेशालिस्ट मेडिकल प्रॅक्टिशनर्सची कमतरता भरून निघेल. मेडिकलच्या पुढील आठ शाखांमध्ये हे पीडी डिप्लोमा कोर्स सुरू होतील - ऑब्स्टेट्रिक्स अँड गायनॅकोलॉजी (Obstetrics and Gynaecology) पीडियाट्रिक्स (Paediatrics) अॅनेस्थेसियोलॉजी (Anaesthesiology) ट्यूबरक्यूलोसिस अँड चेस्ट डिसीज (Tuberculosis and Chest Disease) रेडियो डायग्नोसिस (Radio Diagnosis) फॅमिली मेडिसिन (Family Medicine) ऑप्थैल्मोलॉजी (Ophthalmology) ईएनटी (ENT) कुठे होणार शिक्षण? या विषयी तयार करण्यात आलेल्या नियमांनुसार, कोणत्याही शासकीय किंवा खासगी रुग्णालयात, जिथे १०० हून अधिक बेड आहेत, वरिष्ठ मेडिकल स्पेशालिस्ट आहेत, तेथे हे प्रशिक्षण अभ्यासक्रम चालवले जाऊ शकतात.

from Career News in Marathi: Career News, मराठी Career बातम्या | Maharashtra Times https://ift.tt/2YszB2N
via IFTTT