जेईई मेन परीक्षेचा निकाल कधी? शिक्षणमंत्री म्हणाले...

: देशभरात विद्यार्थी पालकांकडून कडाडून झालेल्या विरोधात, करोनाच्या पार्श्वभूमीवर जेईई मेन २०२० परीक्षा घेण्यात आली. ही परीक्षा १ ते ६ सप्टेंबर २०२० या कालावधीत झाली. केंद्रीय शिक्षणमंत्री डॉ. रमेश पोखरियाल निशंक यांनी बुधवारी जेईई मेन २०२० परीक्षा देणाऱ्या सर्व विद्यार्थ्यांचे आणि पालकाचेही आभार मानले. त्यांनी जेईई मेनच्या निकालाबाबतही भाष्य केलं. जेईई मेन २०२० परीक्षेचा निकाल जारी करण्याची प्रक्रिया सुरू झालेली आहे आणि लवकरच हा निकाल जाहीर केला जाईल, असे पोखरियाल म्हणाले. 'सरकारवर विश्वास ठेवल्याबद्दल आणि जेईई मेन परीक्षेत सहभागी झाल्याबद्दल सर्व विद्यार्थी आणि पालकांचे आभार. निकालाची प्रक्रिया सुरू झालेली आहे आणि लवकरच निकालांची घोषणा करण्यात येईल,' असे ट्विट पोखरियाल यांनी केले आहे. नॅशनल टेस्टिंग एजन्सी (NTA) आणि अधिकाऱ्यांचेही त्यांनी आभार मानले. ही इंजिनीअरिंग प्रवेश परीक्षा सुरक्षित आणि सुरळीतपणे पार पाडण्याचे काम या अधिकाऱ्यांनी केल्याचे त्यांनी म्हटले आहे. जेईई मेन परीक्षा २०२० च्या निकालाच्या बाबतीत jeeadv.ac.in वर उपलब्ध माहितीनुसार, ११ सप्टेंबर रोजी हा निकाल जाहीर होण्याची शक्यता आहे. जेईई मेनचा निकाल जारी झाल्यानंतर पात्र उमेदवारांना आयआयटी, एनआयटी, जीएफआयटीमधील अभ्यासक्रमांच्या प्रवेश प्रक्रियेत सहभागी होता येते. यंदा ८ लाखांहून अधिक विद्यार्थ्यांनी जेईई मेन परीक्षा दिली. ही संगणक आधारित परीक्षा होती.

from Career News in Marathi: Career News, मराठी Career बातम्या | Maharashtra Times https://ift.tt/3m3Jb6p
via IFTTT