मोठ्या विद्यापीठांमध्ये MCQ बेस्ड पदवी परीक्षा; क्वेशन बँक लवकरच

म. टा. प्रतिनिधी, पुणे सावित्रीबाई फुले पुणे विद्यापीठ, मुंबई विद्यापीठ अशा मोठ्या विद्यापीठांमध्ये एमसीक्यू बेस्ड परीक्षा होणार असून, येत्या तीन-चार दिवसांत विद्यार्थ्यांना क्वेशन बँक उपलब्ध करुन देण्यात येईल, अशी माहिती उच्च व तंत्रशिक्षण मंत्री उदय सामंत यांनी रविवारी रात्री दिली. होम असायनमेंटच्या पद्धतीने परीक्षा घेणे शक्य नसून, विद्यापीठांच्या परीक्षा मंडळांनी घेतलेल्या निर्णयाचे सर्व अंतिम वर्षाच्या विद्यार्थ्यांनी पालन करुन परीक्षा देण्याचे आवाहन सामंत यांनी केले. सामंत यांनी फेसबुक लाइव्हद्वारे राज्यातील विद्यार्थ्यांशी संवाद साधत त्यांना अंतिम वर्षाच्या परीक्षांबाबत झालेल्या विविध टप्प्यांची माहिती दिली. मराठा आरक्षणासाठी राज्य सरकार कटिबद्ध असून, विद्यार्थ्यांनी प्रवेशांबाबत काळजी करू नये, अशीही माहिती सामंत यांनी दिली. सामंत म्हणाले की, सावित्रीबाई फुले पुणे विद्यापीठ, मुंबई विद्यापीठ, राष्ट्रसंत तुकडोजी महाराज नागपूर विद्यापीठ, डॉ. बाबासाहेब आंबेडकर मराठवाडा विद्यापीठ, संत गाडगेबाबा अमरावती विद्यापीठ अशा विद्यापीठांमध्ये अंतिम वर्षाच्या विद्यार्थ्यांची संख्या मोठ्या प्रमाणात आहे. या विद्यार्थ्यांची परीक्षेत काळजी घेण्याचे मोठे आव्हान आहे. त्यामुळे सुरक्षित अंतराचे नियम पाळून विद्यार्थ्यांच्या परीक्षा ऑनलाइन पद्धतीने एमसीक्यू पॅटर्नद्वारे घरबसल्या होऊ शकतात. कुलगुरुंच्या समितीने अशा प्रकारे सूचना केल्या आहेत. या परीक्षांबाबतचा निर्णय प्रत्येक विद्यापीठांने त्यांच्या पातळीवर घेतला आहे. त्यामुळे विद्यार्थ्यांनी आता एमसीक्यू पद्धतीने परीक्षा देण्याची तयारी करावी. त्यासाठी सर्वोतोपरी मार्गदर्शन विद्यापीठांकडून विद्यार्थ्यांना मिळेल, असेही सामंत यांनी सांगितले. अंतिम वर्षाच्या परीक्षा नियोजनाबाबत राज्यातील विद्यापीठांच्या दौऱ्याला आज सोमवारपासून सुरुवात करण्यात येणार असल्याचे सामंत यांनी सांगितले.

from Career News in Marathi: Career News, मराठी Career बातम्या | Maharashtra Times https://ift.tt/2DVvGoc
via IFTTT