कोविड काळात परीक्षांसंबंधी सुधारित SOP जारी

कोविड-१९ महामारी प्रादुर्भावाच्या काळात परीक्षांचे आयोजन करताना खबरदारीचे काय उपाय योजायला हवेत, याबाबतचे सुधारित SOP अर्थात स्टँडिंग ऑपरेटिंग प्रोसिजर केंद्र सरकारने जारी केले आहे. करोनाची लागण झालेल्या विद्यार्थ्यांना परीक्षेला बसू देण्याची आधीच्या SOP मध्ये असलेली परवानगी नव्या SOP तून काढून टाकण्यात आली आहे. यापूर्वीच्या निकषांनुसार, करोनाबाधित विद्यार्थ्याची परीक्षेला बसण्याची इच्छा असेल तर त्याला आयसोलेशनमध्ये परीक्षा देण्याची परवानगी होती. केंद्रीय आरोग्य मंत्रालयाने जारी केलेल्या नव्या सुधारित मार्गदर्शक तत्त्वांनुसार, ज्या विद्यार्थ्यांला करोनाची लागण झाली आहे, त्याला जवळच्या आरोग्य केंद्रात पाठवून अन्य मार्गांनी परीक्षा देण्याची संधी द्यावी अथवा नंतर हा बाधित विद्यार्थी करोना निगेटिव्ह झाल्यानंतर त्याची परीक्षा घेण्यात यावी, असे निर्देश सुधारित SOP मध्ये देण्यात आले आहेत. मात्र, विद्यार्थी करोना बाधित असल्याचे आढळल्यानंतर त्याला परीक्षेला बसू देण्याचा किंवा नाकारण्याचा अधिकार आधीच्या पॉलिसीनुसार संबंधित परीक्षा आयोजकांना असेल, असे यात नमूद करण्यात आले आहे. केंद्रीय आरोग्य मंत्रालयाने २ सप्टेंबर रोजी जारी केलेल्या मार्गदर्शक तत्त्वांनुसार, कन्टेन्मेंट झोनमधील कर्मचारी, परीक्षकांना परीक्षा केंद्रावर उपस्थित राहण्याची परवानगी नाकारण्यात आली आहे. अशा कन्टेन्मेंट झोनमधील विद्यार्थ्यांसाठी पर्यायी व्यवस्था करण्याचे निर्देश देण्यात आले आहेत. अशा विद्यार्थ्यांची परीक्षा नंतर घेण्यात यावी, अशाही सूचना देण्यात आल्या आहेत. अन्य सूचना पुढीलप्रमाणे - - विद्यापीठ, शैक्षणिक संस्थांनी परीक्षा केंद्रावरील विद्यार्थी आणि कर्मचाऱ्यांच्या वैयक्तिक सुरक्षेसाठी मास्क, फेस कव्हर्स, अन्य हँड सॅनिटायझर्स, साबण, सोडिअम हायड़्रोक्लोराइट सोल्युशन आदी वस्तूंची व्यवस्था करावी. - विद्यार्थी, कर्मचाऱ्यांकडून त्यांच्या आरोग्याच्या स्थितीविषयीचे सेल्फ डिक्लेरेशन भरून घ्यावे. अॅडमिट कार्ड देतानाच असे डिक्लेरेशन भरून घेता येईल. - असे सेल्फ डिक्लेरेशन सबमिट न केलेल्या विद्यार्थ्याला प्रवेश नाकारावा. - परीक्षा केंद्रात केवळ बाधित नसलेला, लक्षणे नसलेला कर्मचारी वर्ग आणि विद्यार्थी यांनाच प्रवेश द्यावा. - परीक्षा केंद्रात उपस्थित असलेल्या प्रत्येकाने पूर्णवेळ मास्क वापरणे बंधनकारक आहे. - परीक्षा केंद्रावर गर्दी होणार नाही, असे वेळेचे नियोजन करावे. - जेथे पेन-पेपर टेस्ट असेल तेथे पर्यवेक्षकाने पेपर हाताळताना, प्रश्नपत्रिका, उत्तरपत्रिकांचे वाटप करण्यापूर्वी हात सॅनिटाइज करावेत. - परीक्षा संपल्यावर गोळा केलेले पेपरचे गठ्ठे ७२ तासांनंतर उघडावेत. - पेपर वाटताना, हाताळताना बोटांना थुंकी लावण्याला परवानगी नाही.

from Career News in Marathi: Career News, मराठी Career बातम्या | Maharashtra Times https://ift.tt/3mavVgv
via IFTTT