Thank A Teacher: 'असा' साजरा होणार शाळांमध्ये शिक्षक दिन

Teachers Day 2020 : भारताचे राष्ट्रपती सर्वपल्ली राधाकृष्णन यांच्या जन्मदिनानिमित्त ५ सप्टेंबर रोजी भारतात साजरा करण्यात येतो. यंदा शिक्षण ऑनलाइन सुरू असल्यामुळे या विशेष दिवसावर देखील करोनाचे सावट आहे. पण तरीही शासनाने हा दिवस कसा साजरा करता येईल, याबाबतची रुपरेषा जारी केली आहे. त्यानुसार, ज्या शिक्षकांनी आपल्या आयुष्यात परिवर्तन आणले अशा शिक्षकांचे आभार व्यक्त करण्यासाठी राज्य शासनाने एक अभियान राबविण्याचे ठरविले आहे. या अभियानांतर्गत आपल्या आवडत्या शिक्षकांबद्दलच्या भावना व्यक्त करायच्या आहेत. हे अभियान ५ सप्टेंबर ते १० सप्टेंबरपर्यंत आयोजित करायचे आहे. शिक्षकांच्या मार्गदर्शनामुळे आपल्या आयुष्यामध्ये जे आमूलाग्र बदल झाले, जी प्रगती झाली, ती शब्दरुपाने व्यक्त करण्यासाठी #Thank A Teacher ही मोहीम राबवण्यात येणार आहे. ही मोहीम, फेसबुकवर - Thxteacher ट्विटरवर - @thxteacher1 इन्स्टाग्रामवर - @thankuteacher1 या सोशल मीडियाद्वारे राबवण्यात येणार आहे. समाजातील सर्व घटकांनी यात सहभागी व्हावे, असे आवाहन शालेय शिक्षण व क्रीडा विभागाने केले आहे. शाळा काय करणार? १) शाळा बंद शिक्षण सुरू उपक्रम यशोगाथा सादरीकरण - कोविड-१९ च्या प्रादुर्भावादरम्यान, शाळा बंद असल्या तरी विविध माध्यमातून मुलांचे शिक्षण सुरू राहील यासाठी शिक्षक प्रयत्न करत आहेत. त्यांच्या या उपक्रमांच्या यशोगाथांचे सादरीकरण केंद्र, तालुका आणि जिल्हा स्तरावरून करण्यात यावे. २) कोविड-१९ काळातील शिक्षणावर परिसंवाद - दुर्गम व शहरी भागातील शिक्षकांसोबत काही स्वयंसेवक, शिक्षक मित्र शिक्षण देण्याचे काम स्वयंस्फूर्तीने करत आहेत. अशा व्यक्तींचे वेबिनार आयोजित करावेत. यात शाळा व्यवस्थापन समिती आणि पालकांना सहभागी करून घ्यावेय ३) विद्यार्थी व पालकांसाठी विविध विषय देऊन ऑनलाइन वक्तृत्व, निबंध, पोस्टर, घोषवाक्य, गीतवाचन, नाट्यवाचन, अभिवाचन स्पर्धांचे आयोजन करावे. ४) मी कोविडयोद्धा - करोना काळात शिक्षक व शिक्षण क्षेत्रातील अधिकाऱ्यांनी कोविड योद्धा म्हणून विविध कामे पार पाडली. उदा. तपासणी करणे, बाहेरून आलेल्या नागरिकांचे सर्वेक्षण करणे, विलगीकरण कक्षात निरीक्षक म्हणून काम करणे. या व इतर कामाचे अनुभव कथन करून त्यांच्या कामाचे कौतुक करणे. या संपूर्ण कार्यक्रमासंबंधीचा सविस्तर आढावा घेणारा जीआर राज्य शासनाने जारी केला आहे. हा जीआर शासनाच्या संकेतस्थळावर उपलब्ध आहे.

from Career News in Marathi: Career News, मराठी Career बातम्या | Maharashtra Times https://ift.tt/3lOchGK
via IFTTT