नीट निकालाविरोधात याचिका; प्रवेश प्रक्रियेला स्थगिती देण्याची मागणी

NEET result vs OMR Sheet calculation: नॅशनल टेस्टिंग एजन्सी (NTA) ने २०२० चा निकाल १६ ऑक्टोबर रोजी जारी केला. पण आता या निकालावरून वादंग उठत आहेत. काही विद्यार्थ्यांनी या निकालाविरोधात हायकोर्टात दाद मागितली आहे. एनटीएद्वारा जारी झालेल्या ओएमआर शीटनुसार त्यांचे गुण आणि नीट निकालात मिळालेले गुण यात तफावत आहे. विद्यार्थी-पालकांचा आरोप अमरावतीतील एक विद्यार्थिनी वसुंधरा भोजणे हिने नीट निकालाविरोधात मुंबई हायकोर्टात याचिका दाखल केली आहे. एनटीनेने जारी केलेल्या ओेएमआर शीटनुसार तिला ७२० पैकी ६०० गुण मिळायला हवे आहेत. मात्र नीट निकाल जारी झाल्यानंतर तिला तिचे गुण पाहून धक्का बसला आहे.. तिला ७२० पैकी शून्य गुण मिळाले आहेत. आणखी एका विद्यार्थ्याला २१२ गुण मिळाले आहेत, पण हे गुण ओएमआर शीटनुसार काढलेल्या गुणांच्या तुलेनत खूप कमी आहेत, असं त्याचं म्हणणं आहे. त्याच्या वडिलांचं म्हणणं आहे की ओएमआर शीटनुसार त्याला ७०० हून अधिक गुण मिळायला हवे होते. काही पालकांचं म्हणणं आहे की ओएमआर शीट्ससोबत छेडछाड झाली आहे. एक पालक सुधा शेणॉय यांच्या मते एका विद्यार्थ्याची सुमारे ६० प्रश्नांच्या उत्तरांची सॉफ्टवेअरमध्ये नोंदच झालेली नाही. एका सरकारी अधिकाऱ्याचं म्हणणं आहे की अनेकदा विद्यार्थीच दबावापोटी ओएमआर शीट्सशी छेडछाड करतात. यापूर्वी देखील कोर्टात अशी प्रकरणे आली होती, नंतर त्या याचिका मागे घेण्यात आल्या होत्या. एनटीएचं म्हणणं काय? एनटीएचे महासंचालक विनीत जोश म्हणाले, 'विद्यार्थ्यांकडून आलेल्या सर्व दाव्यांची शहानिशा केल्यानंतरच निकालाची घोषणा केलेली आहे. आताही विद्यार्थी ओएमआर शीट ऑनलाइन चेक करू शकतात. जर कोर्टाने निर्देश दिले तर आम्ही यासंबंधी प्रतिज्ञापत्रही सादर करू.' प्रवेश प्रकिया थांबणार का? वकील अश्विन देशपांडे यांनी हायकोर्टात सांगितले की वसुंधरा हिचा अॅकेडमिक रेकॉर्ड चांगला आहे. दहावीलाही तिला ९३.४० टक्के आणि बारावीत ८१.९ टक्के होते. नीटमध्ये तिला शून्य गुण मिळणं अशक्य आहे. हे तांत्रिक त्रुटीमुळेच होऊ शकते. वसुंधरा हिच्या वतीने वकिलांनी उत्तरपत्रिका पुन्हा तपासण्याची मागणी केली आहे. सोबतच हायकोर्टाला विनंती केली आहे की एनटीएने कोर्टात वसुंधरा हिची ओरिजनल ओएमआर शीट सादर करावी. सोबतच ही याचिका निकाली निघत नाही तोपर्यंत मेडिकल प्रवेश प्रक्रियेला अंतरिम स्थगिती द्यावी. मुंबई हायकोर्टाच्या नागपूर खंडपीठाने या प्रकरणाची पुढील सुनावणी २६ ऑक्टोबर रोजी ठेवली आहे. तत्पूर्वी एनटीएला आपले म्हणणे मांडावे असे म्हटले आहे.

from Career News in Marathi: Career News, मराठी Career बातम्या | Maharashtra Times https://ift.tt/31n5nQi
via IFTTT