नीट काऊन्सेलिंगच्या पहिल्या फेरीला आजपासून सुरुवात

Counselling 2020: एमबीबीएस आणि बीडीएस अभ्यासक्रमांच्या प्रवेशांसाठी नीट २०२० काऊन्सेलिंग प्रक्रिया आज मंगळवार २७ ऑक्टोबरपासून सुरू झाली आहे. मेडिकल काऊन्सेलिंग कमिटी (MCC) द्वारे हे काउन्सेलिंग १५ % अखिल भारतीय कोटा (AIQ) आणि केंद्रीय व डीम्ड विद्यापीठे, AIIMS आणि JIPMER संस्थांनी प्रस्तावित केलेल्या जागांसाठी होणार आहे. २७ ऑक्टोबर पासून नीट यूजी काऊन्सेलिंगच्या पहिल्या फेरीला सुरुवात होणार आहे. या प्रक्रियेत सहभागी होण्यासाठी आधी विद्यार्थ्यांना नोंदणी करणे अनिवार्य आहे. यानंतर पसंतीक्रम भरणे आणि पुढील अन्य प्रक्रिया पूर्ण करता येतील. कशी करायची नोंदणी? - नीट ऑल इंडिया काउन्सेलिंग प्रक्रियेत सहभागी होण्यासाठी mcc.nic.in वर रजिस्टर करावे लागेल. - एमसीसीच्या संकेतस्थळावर जा. - होम पेजवर डावीकडे न्यू रजिस्ट्रेशन लिंक दिसेल. त्यावर क्लिक करा. - यात विचारलेली सर्व माहिती भरून रजिस्टर करा. - रजिस्टर केल्यानंतर तुम्हाला एक आयडी मिळेल. - पुढील सर्व प्रक्रियेसाठी हा आयडी महत्त्वाचा असणार आहे. त्यामुळे तो सुरक्षितपणे नोंदवून ठेवा. ही चूक करू नका नीट यूजी काऊन्सेलिंगसाठी उमेदवाराला एकदाच रजिस्ट्रेशन करता येतं. त्यामुळे एकाहून जास्त वेळा रजिस्ट्रेशनचा प्रयत्न केल्यास तुम्हाला ब्लॉक केलं जाईल, ही गोष्ट ध्यानात ठेवा. पसंतीक्रम रजिस्ट्रेशन प्रक्रिया पूर्ण झाल्यानंतर २८ ऑक्टोबर २०२० पासून पसंतीक्रम प्रक्रियेला सुरुवात होईल. ही प्रक्रिया देखील एमसीसीच्या वेबसाइटच्या माध्यमातून करायची आहे. तुम्हाला मिळालेल्या रजिस्ट्रेशन आयडीद्वारे लॉग इन करा. पसंती क्रमाच्या संबंधित लिंकवर क्लिक करा. कॉलेज आणि कोर्सचा पर्याय निवडा. तुमच्या रँकनुसार पर्याय निवडा. तुम्हाला काऊन्सेलिंग शुल्क देखील भरायचे आहे. निकाल कधी? एनईईटी समुपदेशन 2020 च्या पहिल्या फेरीसाठी नोंदणी, शुल्क भरणे, पसंतीक्रम नोंदवणे यासाठी २७ ऑक्टोबर ते २ नोव्हेंबर २०२० या कालावधीत प्रक्रिया राबवली जाईल. सीट अलॉटमेंटचा निकाल ५ नोव्हेंबर २०२० रोजी जाहीर होईल. समुपदेशनाची दुसरी फेरी १८ ते २२ नोव्हेंबर २०२० दरम्यान आयोजित केली जाईल. प्रवर्गनिहाय कटऑफ स्कोर सामान्य वर्ग- ७२०- १४७ ओबीसी, एससी,एसटी- १४६-११३ दिव्यांग सामान्य- १४६- १२९ दिव्यांग आरक्षित -१२८- ११३ ५२९ वैद्यकीय महाविद्यालयांमध्ये १.५६ लाख जागा मेडिकल काउन्सिल ऑफ इंडियानुसार, यावर्षी देशातील ५२९ शासकीय, बिगर शासकीय आणि खासगी वैद्यकीय महाविद्यालयांमध्ये एमबीबीएससाठी ७५ हजार हून अधिक आणि बीडीएससाठी २६,९४९, आयुषच्या ५२,७२०, एम्सच्या १२०५, जिपमरच्या २०० आणि बीवीएसच्या ५२५ रिक्त जागांसह एकूण १ लाख ५६ हजार ५५९ जागांवर ऑल इंडिया रँक आणि स्टेट रँकनुसार प्रवेश होतील.

from Career News in Marathi: Career News, मराठी Career बातम्या | Maharashtra Times https://ift.tt/2Tsms71
via IFTTT