UPSC प्रशिक्षणार्थी विद्यार्थ्यांचे विद्यावेतन दुप्पट

UPSC Exam: केंद्रीय लोकसेवा आयोगामार्फत घेण्यात येणाऱ्या स्पर्धा परीक्षांची तयारी करणाऱ्या विद्यार्थ्यांना दिलासा देणारी बातमी आहे. यूपीएससीचं प्रशिक्षण घेणाऱ्या अल्पसंख्याक विद्यार्थ्यांचे विद्यावेत दुप्पट करण्याचा निर्णय कौशल्य विकास आणि अल्पसंख्याक विकास मंत्रालयाने घेतला आहे. यासंदर्भातील शासन आदेशही जारी झाला आहे. अल्पसंख्याक समाजाचे शासकीय सेवेतील प्रमाण वाढवण्यासाठी, या उमेदवारांना प्रोत्साहन देण्यासाठी हा निर्णय घेण्यात आला असल्याचे कौशल्य विकास आणि अल्पसंख्याक विकास मंत्री नवाब मलिक यांनी सांगितले. अल्पसंख्याक मुस्लिम, ख्रिश्चन, बौद्ध, जैन, शीख, पारशी आणि ज्यू समाजाचे शासकीय सेवेतील प्रमाण वाढावे याकरिता केंद्रीय लोकसेवा आयोगाच्या (युपीएससी) स्पर्धा परिक्षेच्या तयारीसाठी अल्पसंख्याक समाजातील निवडक, होतकरु विद्यार्थ्यांना या योजनेंतर्गत प्रशिक्षण दिले जाते. राज्य प्रशासकीय संस्थेच्या मुंबई, कोल्हापूर, नागपूर आणि औरंगाबाद येथील प्रशिक्षण केंद्रांमध्ये प्रति केंद्र दहा विद्यार्थ्यांना हे प्रशिक्षण देण्यात येते. या विद्यार्थ्यांना सध्या प्रति महिना २ हजार रुपये इतके विद्यावेतन देण्यात येते. यापूर्वी, उच्च व तंत्रशिक्षण विभागामार्फत राबविण्यात येत असलेल्या नागरी सेवा पूर्व परिक्षा प्रशिक्षण योजनेंतर्गत विद्यार्थ्यांच्या विद्यावेतनात प्रति महिना २ हजार रुपयांवरुन ४ हजार रुपये इतकी वाढ करण्यात आली आहे. अशाच पद्धतीने अल्पसंख्याक समाजातील विद्यार्थ्यांच्या विद्यावेतनातही वाढ करण्याचा निर्णय घेण्यात आल्याचे मंत्री मलिक यांनी सांगितले. विद्यावेतनातील ही वाढ २०२०-२१ या शैक्षणिक वर्षापासून लागू करण्यात येत आहे.

from Career News in Marathi: Career News, मराठी Career बातम्या | Maharashtra Times https://ift.tt/2I9BHj1
via IFTTT