शिक्षण अव्वल दर्जाचे करणार: मुख्यमंत्री उद्धव ठाकरे यांची ग्वाही

म. टा. विशेष प्रतिनिधी, मुंबई जागतिक स्तरावरील सर्वोच्च पुरस्कारप्राप्त रणजितसिंह डिसले यांच्यासारखे नाविन्यपूर्ण उपक्रम राबवून शिक्षण क्षेत्रात वेगवेगळे प्रयोग राबवणाऱ्या राज्यातील शिक्षकांना सोबत घेऊन शेवटच्या विद्यार्थ्यापर्यंत अव्वल दर्जाचे शिक्षण पोहचवण्यासाठी आराखडा तयार करावा, असे निर्देश मुख्यमंत्र्यांनी दिले आहेत. युनेस्को व लंडनस्थित वार्की फाउंडेशन यांच्या वतीने दिला जाणारा ग्लोबल टीचर पुरस्कार मिळालेल्या रणजितसिंह डिसले यांचा सत्कार करण्यात आला. त्यावेळी मुख्यमंत्री बोलत होते. डिसले यांनी हा पुरस्कार शिक्षण क्षेत्रातील उत्तम कामाने मिळाला आहे. शिवाय त्यांनी पुरस्काराची रक्कम या स्पर्धेतील इतर नऊ स्पर्धकांमध्ये वाटून दिली आहे. त्यांनी केलेले कार्य हे ध्येय्यवेडाचे उदाहरण आहे. असेही ते म्हणाले. सोलापूरसारख्या दुष्काळी समजल्या जाणाऱ्या भागातील जिल्हा परिषदेतील शिक्षकाने हा पुरस्कार मिळविला, ही खरेच अभिनंदनीय बाब आहे. या शाळांमधील काम उत्तम आहे, याचा दाखला या पुरस्काराच्या रुपाने मिळाला आहे, असे उपमुख्यमंत्री अजित पवार यावेळी म्हणाले. विद्यार्थ्यांसाठी अधिक आनंददायी आणि ज्ञानवर्धक शिक्षण कसे देता येईल यासाठी शालेय शिक्षण विभागाने त्यांच्या ज्ञानाचा वापर करावा, असेही त्यांनी सांगितले. इंग्रजी शाळांबरोबर स्पर्धा करणाऱ्या शाळा म्हणून जिल्हा परिषदेच्या शाळा ओळखल्या जात आहेत. यात डिसले यांच्यासारख्या शिक्षकांचा मोलाचा वाटा आहे, असे महसूलमंत्री बाळासाहेब थोरात म्हणाले. तर शालेय शिक्षणमंत्री वर्षा गायकवाड यांनी, डिसले यांनी शैक्षणिक क्षेत्रात केलेल्या उल्लेखनीय कामगिरीमुळे महाराष्ट्राचे नाव देशातच नव्हे तर जगभर पोहोचले असून त्यांच्या कार्याचा अभिमान वाटतो, असे गौरवोद्गार काढले. जिल्हा परिषदेच्या अनेक शाळांमधून जास्तीत जास्त तंत्रस्नेही व सृजनशील शिक्षक निर्माण करण्यासाठी मी प्रयत्न करणार अशी भावना सत्काराला उत्तर देताना रणजितसिंह डिसले यांनी व्यक्त केली. यावेळी नगरविकासमंत्री एकनाथ शिंदे, परिवहनमंत्री अनिल परब, पर्यटनमंत्री आदित्य ठाकरे उपस्थित होते.

from Career News in Marathi: Career News, मराठी Career बातम्या | Maharashtra Times https://ift.tt/2LhtyKV
via IFTTT