'स्वाध्याय' उपक्रमात ११ लाख विद्यार्थी सहभागी

म. टा. विशेष प्रतिनिधी, मुंबई महाराष्ट्र शासन व राज्य शैक्षणिक संशोधन व प्रशिक्षण परिषदेतर्फे (एससीईआरटी) 'स्टुडंट व्हॉट्सअॅप बेस्ड डिजिटल होम अेसेसमेंट' (स्वाध्याय) योजनेची सुरुवात ३ नोव्हेंबरला करण्यात आली होती. हा उपक्रम सुरू झाल्यापासून सहा आठवड्यांमध्ये ११ लाख विद्यार्थी सहभागी झाले असून त्यांनी साप्ताहिक सराव आणि गृहशिक्षणास सुरुवात केली आहे. विद्यार्थ्यांना घरी बसून त्यांच्या अभ्यासाचे मूल्यमापन करता यावे या उद्देशाने सरकारने हा उपक्रम सुरू केला होता. यामध्ये व्हॉट्सअॅपद्वारे विद्यार्थ्यांना सरावासाठी स्वाध्याय उपलब्ध करून देण्यात येत आहे. या माध्यमातून पहिली ते १०वीपर्यंतच्या सर्व इयत्तांमधील विद्यार्थ्यांच्या फोनवर प्रश्नमंजुषा घरच्या घरी उपलब्ध करून देण्यात आली आहे. 'स्वाध्याय' हा उपक्रम मुख्यतः राज्यातील विद्यार्थ्यांची पायाभूत साक्षरता आणि संख्याज्ञान वाढविण्याचे एक साधन म्हणून वापरला जात आहे. करोनामुळे अचानक करण्यात आलेले लॉकडाउन आणि त्यामुळे बंद झालेल्या शाळा यामुळे एक संकट निर्माण झाले होते. पण शासनाच्या 'शाळा बंद पण शिक्षण आहे' उपक्रमातंर्गत शिक्षण विभाग आणि शिक्षकांनी अनेक उपक्रम राबविले. त्यामध्ये ऑफलाइन आणि ऑनलाइन अशा दोन्हींचा समावेश होता. त्यामुळे शाळा बंद असल्यातरी विद्यार्थ्यांचे शिक्षण मात्र चालू राहिले, अशी भावना सातारा येथील गटशिक्षण अधिकारी आनंद पळसे यांनी व्यक्त केली. भविष्यात स्वाध्याय 'युडायस' कोडशी जोडला जाणार आहे. त्यानुसार शिक्षक स्वतःच्या शाळेतील, वर्गातील विद्यार्थी यांची कामगिरी बघू शकतील आणि विद्यार्थ्यांना मदत करू शकतील. प्रारंभी, मराठी आणि सेमी-इंग्रजी माध्यमासाठी मराठी आणि गणिताचे विषय सुरू झाले आहेत. लवकरच इतर माध्यमांचेही विषय सुरू करण्यात येणार आहे.

from Career News in Marathi: Career News, मराठी Career बातम्या | Maharashtra Times https://ift.tt/3peh85c
via IFTTT