प्रॅक्टिकलसाठी तरी कॉलेज सुरू करा; विद्यार्थ्यांची मागणी

म. टा. प्रतिनिधी, पुणे करोना व लॉकडाउनमुळे फार्मसी अभ्यासक्रमांच्या विद्यार्थ्यांनाही प्रत्यक्ष अनुभवापासून वंचित राहावे लागले आहे. अभ्यासक्रमातील थिअरीचा भाग ऑनलाइन पद्धतीने शिकून पूर्ण झाला असला, तरी कंपनीत किंवा औषधालयात काम करण्याचा अनुभव या विद्यार्थ्यांना मिळू शकलेला नाही. प्रॅक्टिकल भाग शिकण्यासाठी त्वरित महाविद्यालये सुरू करण्याची गरज विद्यार्थी व्यक्त करत आहेत. लॉकडाउनमुळे महाविद्यालये बंद करावी लागली. त्यामुळे जवळपास दोन महिने विद्यार्थ्यांचे शिक्षण ठप्पच झाले होते. त्यानंतर बहुतांश महाविद्यालयांनी ऑनलाइन पद्धतीने आपापले अभ्यासक्रम पूर्ण केले. ऑनलाइन पद्धतीमध्ये विद्यार्थ्यांना संकल्पना समजावणे शक्य असले, तरी फार्मसी अभ्यासक्रमाचा महत्त्वाचा भाग असलेले प्रयोगशाळेतील प्रयोग मात्र, करणे शक्य झाले नाही. त्यासाठी काही महाविद्यालयांनी व्हर्च्युअल (सिम्युलेशन) प्रयोगांचा पर्याय शोधला. मात्र, त्यालाही मर्यादा होत्या. त्याचबरोबर बी. फार्म, एम. फार्मसाठी विद्यार्थ्यांना इंटर्नशिप अथवा प्रोजेक्ट्स करणे शक्य झाले नाही. फार्मसीमध्ये तीन चार विषयांना प्रात्यक्षिकांवर भर असतो. फार्मास्युटिक्स, फार्माकोलॉजी, फार्मास्युटिकल केमिस्ट्री या विषयांसाठी प्रॅक्टिकल केल्याशिवाय पर्याय नाही. या विषयांमध्ये विद्यार्थ्यांचा 'हँड्स ऑन एक्स्पिरियन्स' महत्त्वाचा ठरतो. लॉकडाउन काळात आम्ही ऑनलाइन सिम्युलेशनच्या माध्यमातून काही प्रयोग करवून घेतले. त्यातून विद्यार्थ्यांना संकल्पना समजते. परंतु. प्रत्यक्ष प्रयोग करण्याचा अनुभव मिळत नाही. त्यासाठी पुन्हा महाविद्यालये सुरू व्हायला हवीत, असे 'डॉ. विश्वनाथ कराड एमआयटी विश्वशांती विद्यापीठाच्या स्कूल ऑफ फार्मसी'चे अधिष्ठाता डॉ. बी. एस. कुचेकर यांनी सांगितले. 'अभ्यासक्रमाचा भाग म्हणून आवश्यक असलेल्या प्रकल्पासाठी एका कंपनीत माझी निवड झाली होती. तसे पत्रही मिळाले होते. एप्रिल महिन्यापासून मी काम सुरू करणार होतो. परंतु, लॉकडाउनमुळे कंपनीने सध्या प्रशिक्षणार्थी विद्यार्थ्यांना कामावर बोलवता येणार नसल्याचे स्पष्ट केले. त्यामुळे माझी ही संधी हुकली,' असे प्रतीक या एम. फार्मच्या विद्यार्थ्याने सांगितले. --- लॉकडाउनच्या काळात ऑनलाइन पद्धतीने विद्यार्थ्यांना शिकवून अभ्यासक्रम पूर्ण करून घेतला. प्रात्यक्षिकाच्या भागासाठी प्राध्यापकांनी काही व्हिडिओ करून विद्यार्थ्यांना पाठवले; तर विद्यार्थ्यांना त्यांच्या घरी, जवळपास उपलब्ध साधनांमधून करता येण्यासारखे काही प्रयोग करण्यास दिले. मात्र, लॉकडाउन असल्याने विद्यार्थ्यांना कंपन्यांमध्ये जाऊन काम करता आले नाही. काही विद्यार्थ्यांना औषधालये किंवा रुग्णालयातील औषधालयात काम करता आले. महाविद्यालये लवकरात लवकर सुरू झाल्यास प्रात्यक्षिकांविषयी विद्यार्थ्यांना अधिक प्रशिक्षण देता येईल. - प्रा. डॉ. किरण भिसे , प्राचार्य, अलान्ना इन्स्टिट्यूट ऑफ फार्मसी विद्यार्थी पुरेसा अनुभव घेतलेले व रोजगारक्षम असतील, तर उद्योगजगताकडून त्यांना प्राधान्य दिले जाते. त्यासाठी फार्मसी अभ्यासक्रमांमध्ये प्रोजेक्ट्सचा अंतर्भाव असतो. त्यात विद्यार्थी प्रत्यक्ष कामाचा अनुभव घेतात. यंदा विद्यार्थ्यांना कंपनीत प्रत्यक्ष कामाची संधी मिळाली नाही. त्यामुळे थिअरीच्या अभ्यासावरच त्यांना लक्ष केंद्रित करावे लागले. - प्रा. डॉ. बी. एस. कुचेकर कॉलेजने ऑनलाइन पद्धतीने अभ्यासक्रम पूर्ण केला. व्हिडिओजच्या माध्यमातून प्रात्यक्षिकेही घेतली गेली. त्यातील शंकांचे प्राध्यापकांनी व्हिडिओ कॉलद्वारे निरसन केले. कंपन्यांमधील इंटर्नशिप अलीकडे सुरू झाली आहे. परंतु, हॉस्पिटल किंवा औषधालयात कार्यानुभवाची संधी मिळू शकलेली नाही. -आफरिन चौगुले, विद्यार्थिनी फार्मसीमध्ये प्रॅक्टिकल्स हा महत्त्वाचा भाग आहे. प्रत्यक्ष औषधनिर्मिती, फॉर्म्युलेशन, कॉस्मेटिक्सची निर्मिती, केमिकल अॅनॅलिसिस या गोष्टी प्रयोगशाळेतूनच चांगल्या पद्धतीने शिकता येतात. करोनासाठी आवश्यक काळजी घेऊन किमान प्रॅक्टिकल्ससाठी सुरू करावीत. - ओंकार राजहंस, विद्यार्थी

from Career News in Marathi: Career News, मराठी Career बातम्या | Maharashtra Times https://ift.tt/3hl2ZR2
via IFTTT