JEE Main 2021 गोंधळ: तारखांचं परिपत्रक NTA ने घेतलं मागे

JEE Main 2021: देशभरातील आयआयटींमधील अभियांत्रिकी पदवी अभ्यासक्रमांच्या प्रवेशांसाठी घेतल्या जाणाऱ्या जॉइंट एन्ट्रन्स एक्झाम अर्थात JEE Main परीक्षेच्या २०२१ मधील तारखांची घोषणा मंगळवारी नॅशनल टेस्टिंग एजन्सीने केली. मात्र, सायंकाळी उशिरा हे परिपत्रक एनटीएने मागे घेतलं. १५ डिसेंबरपासून या परीक्षेसाठी नोंदणी प्रक्रिया सुरू होणार होती, त्यासंबंधीचं परिपत्रकही मागे घेण्यात आलं आहे. शिक्षण मंत्रालयाचं म्हणणं आहे की अद्याप परीक्षेच्या तारखेसंबंथी अद्याप कोणताही निर्णय झालेला नाही. त्यामुळे जोपर्यंत शिक्षण मंत्रालयाचा निर्णय जाहीर होत नाही, तोपर्यंत जेईई मेनच्या तारखा निश्चित सांगता येणार नाहीत. मात्र, जेईईचं हे परिपत्रक तूर्त मागे घेण्यात आलं असलं तरी त्यातली माहिती थोड्याफार फरकानं सारखीच राहिल असं म्हटलं जात आहे. जेईई मेन एकाहून अधिक सत्रांमध्ये आयोजित करण्यात येईल, हे त्या परिपत्रकातून स्पष्ट झालं होतं. शिवाय शिक्षणमंत्री डॉ. रमेश पोखरियाल यांनीही अलीकडेच एका वेबिनारमधून जेईई मेन दोनपेक्षा अधिक सत्रात घेण्याचा सरकारचा मानस बोलून दाखवला होता. विविध राज्यांच्या बारावी बोर्ड परीक्षांच्या आयोजनाबाबत अद्याप स्पष्टता नाही. त्यामुळे त्या परीक्षा जेईई मेनशी क्लॅश होऊ नयेत यासाठी जेईईची सत्रे वाढवली जाण्याची शक्यता आहे. पॅटर्नमध्येही बदल? मंगळवारी जारी करून नंतर मागे घेतलेल्या परिपत्रकातून जेईई मेन परीक्षेच्या पॅटर्नमधील बदलही पुढे आला होता. त्यानुसार, प्रत्येक विषयात यंदा ३० ऐवजी २५ प्रश्न असणार असल्याची माहिती मिळत होती. परीक्षेच्या तारखा कदाचित नव्याने जाहीर केल्या जातील, मात्र अन्य माहिती जैसे थे राहण्याची शक्यता आहे.

from Career News in Marathi: Career News, मराठी Career बातम्या | Maharashtra Times https://ift.tt/3nnlZR6
via IFTTT