अकरा महिन्यांनी गजबजली राज्यातील महाविद्यालये

म. टा. प्रतिनिधी, पुणे अकरा महिन्यांच्या कालावधीनंतर सोमवारी शहरातील महाविद्यालयांचे आवार पुन्हा विद्यार्थ्यांमुळे गजबजले. सुरक्षेचे निकष पाळत दीर्घकाळानंतर प्राध्यापक, मित्र-मैत्रिणींशी प्रत्यक्ष संवाद साधण्याचा आनंद विद्यार्थ्यांनी घेतला. वाणिज्य आणि कला शाखेच्या तुलनेत विज्ञान शाखेच्या विद्यार्थ्यांची उपस्थिती अधिक होती. दरम्यान, प्राध्यापक- कर्मचाऱ्यांनी करोना चाचणी पूर्ण न झाल्याने काही महाविद्यालये अद्याप सुरू झालेली नाहीत. करोनासंदर्भातील नियम पाळून सुरुवातीला नववी ते बारावी आणि नंतर पाचवी ते सातवीच्या शाळाही सुरू करण्यात आल्या. मात्र, महाविद्यालये बंदच असल्याने किमान प्रात्यक्षिकांसाठी तरी ती सुरू करा, अशी आग्रही भूमिका ‘महाराष्ट्र टाइम्स’ने सातत्याने लावून धरली. या पार्श्वभूमीवर सावित्रीबाई फुले पुणे विद्यापीठानेही जानेवारी महिन्यातच महाविद्यालये सुरू करण्याची तयारी केली होती. मात्र, उच्च व तंत्रशिक्षण विभागाच्या आदेशामुळे ही तारीख पुढे गेली. शेवटी उच्च व तंत्रशिक्षणमंत्री उदय सामंत यांच्या आदेशानुसार आणि महापालिकेच्या परवानगीनंतर सोमवारपासून पुण्यातील महाविद्यालये अखेर खुली झाली. करोनाचे संकट कायम असल्याने पन्नास टक्के विद्यार्थ्यांनाच महाविद्यालयात प्रवेश देण्याची मुभा आहे. त्यानुसार महाविद्यालयांनी चक्रवार नियोजन केले आहे. अभ्यासक्रमातील ‘थिअरी’चा भाग ऑनलाइन पद्धतीने शिकवून झाल्याने सुरुवातीच्या टप्प्यात प्रात्यक्षिकांवर भर देण्यात आला आहे. सुरुवातीला पदव्युत्तर अभ्यासक्रमाच्या दुसऱ्या वर्षाच्या विद्यार्थ्यांना बोलविण्यात आले असून, त्यानंतर टप्याटप्याने अन्य अभ्यासक्रमांच्या विद्यार्थ्यांना महाविद्यालयात बोलावण्याचे नियोजन करण्यात आले आहे. करोनाचे संकट कायम असल्याने महाविद्यालयांना मार्गदर्शक सूचनांचा अवलंब करणे बंधनकारक आहे. त्यानुसार महाविद्यालयातील वावराविषयी विद्यार्थी आणि पालकांना ऑनलाइन मिटिंगद्वारे सूचना देण्यात आल्या होत्या. सोमवारी प्रवेशद्वारापाशी शारीरिक तापमानाची नोंद घेऊन, ऑक्सिजनची पातळी तपासून, मास्क लावलेल्या विद्यार्थ्यांनाच महाविद्यालयात प्रवेश देण्यात आला. महाविद्यालयाच्या आवारात सुरक्षित वावरासाठी पट्टे आखण्यात आले असून, सॅनिटायझरचीही व्यवस्था करण्यात आली आहे. त्याचबरोबर एक आड एका बाकावर बैठक व्यवस्था करण्यात आली आहे. अशा नवसाधारण वातावरणातच सोमवारी महाविद्यालयांचा पहिला तास रंगला.

from Career News in Marathi: Career News, मराठी Career बातम्या | Maharashtra Times https://ift.tt/2NwAxR4
via IFTTT