Dual Degree: देश-विदेशात एकाच वेळेस पदवी शिक्षण

म. टा. विशेष प्रतिनिधी, मुंबई देशातील आणि परदेशातील शिक्षण संस्थांमध्ये करार करून संयुक्त पदवी आणि दुहेरी पदवी अभ्यासक्रम उपलब्ध करून देण्याचा विचार विद्यापीठ अनुदान आयोग करीत आहे. याबाबत आयोगाने मुसदा तयार केला आहे. हा मसुदा सुचनांसाठी खुला करण्यात आला असून यावर प्रतिक्रया नोंदविण्यासाठी पाच मार्चपर्यंत मुदत देण्यात आली आहे. नवीन शिक्षण धोरणामध्ये परदेशातील विद्यापीठांमधून मिळालेले श्रेयांक देशात पदवीदानासाठी ग्राह्य धरावे असे सांगण्यात आले आहे. याचाच आधार घेऊन आयोगाने याबाबतचा एक मसुदा तयार केला आहे. यावर नियमन करण्यासाठी स्वतंत्र प्राधिकरण असेल याबाबतची घोषणा नुकत्याच पार पडलेल्या केंद्रीय अर्थसंकल्पात करण्यात आली आहे. यासाठी देशातील उच्च शिक्षण संस्थांना परदेशातील संस्थांशी सामंजस्य करार करून पदविका, पदवी, पदव्युत्तर पदवी आणि डॉक्टरेट अभ्यासक्रम सुरू करण्याची मुभा मिळणार आहे. मात्र, ही सुविधा केवळ ऑफलाइल शिक्षणासाठीच असणार आहे. ऑनलाइन किंवा मुक्त अभ्यासक्रम संस्थांना अशी पदवी देता येणार नसल्याचे या मसुद्यात स्पष्ट करण्यात आले आहे. दोन संस्थांमधील करार करताना श्रेयांकाचे मूल्यांकन आणि हस्तांतरण या मुद्द्यावर विशेष भर देण्यात आला आहे. परदेशातील विद्यापीठाने श्रेयांक निश्चित केल्यानंतर त्याचे मूल्यांकन भारतीय शिक्षण संस्थेत स्वतंत्रपणे केले जाणार आहे. तसे करायचे नसेल तर दोन्ही संस्था एकत्रित येऊन श्रेयांक निश्चित करू शकतात असे या मसुद्यात देण्यात आले आहे. मान्यता रद्द करण्याचे आयोगाला अधिकार संस्थांना सहकार्य करार करण्यासाठी विविध कागदपत्रांची पूर्तता करावी लागणार आहे. यानंतर हा करार होऊ शकणार आहे. मात्र, जर याबाबत आयोगाकडे कोणत्याही तक्रारी आल्यातर प्रत्यक्ष भेट देऊन पाहणी करणे किंवा वेळप्रसंगी मान्यता रद्द करण्याचे अधिकार आयोगाला असणार आहेत, असेही या मसुद्यामध्ये स्पष्ट करण्यात आले आहे. या प्रकारच्या अभ्यासक्रमांमुळे विद्यार्थ्ंयाना कमी खर्चात परदेशी विद्यापीठांमधील शिक्षण आणि पदवी मिळवता येणे शक्य होणार आहे.

from Career News in Marathi: Career News, मराठी Career बातम्या | Maharashtra Times https://ift.tt/3uf5MBa
via IFTTT