शाळा-कॉलेजांत व्यावसायिक शिक्षण! अभ्यासासाठी समिती

म. टा. प्रतिनिधी, मुंबई राज्यातील शाळा, कॉलेजामध्ये समाविष्ट करण्याबाबत अभ्यास करण्यासाठी तज्ज्ञ, अधिकाऱ्यांची समिती नेमण्यात आली आहे. ही समिती येत्या तीन महिन्यांत आपला अहवाल सरकारला सादर करणार असल्याची माहिती कौशल्य विकासमंत्री यांनी गुरुवारी दिली. केंद्र सरकारने जाहीर केलेल्या नवीन शैक्षणिक धोरण २०२० (NEP) मध्ये व्यावसायिक शिक्षणाला नवीन स्वरूप देण्याचे नमूद केले आहे. चालू दशकात सर्व शाळा, कॉलेजे व उच्च शिक्षण संस्थांमध्ये व्यावसायिक शिक्षण टप्याटप्याने समाविष्ट करावयाचे असून त्यासाठी कौशल्यविषयक उणीवांचे विश्लेषण व स्थानिक संधीचे मापन याआधारे व्यावसायिक शिक्षणाची प्राधान्य क्षेत्रे निवडण्याची गरज आहे. यासाठी या क्षेत्रातील तज्ज्ञ व वरिष्ठ अधिकाऱ्यांची समिती नेमण्यात आली आहे. समितीने यासंदर्भात सविस्तर अभ्यास करून पुढील तीन महिन्यांत शासनास अहवाल सादर करावा, असे त्या समितीस सांगण्यात आले आहे. या समितीच्या अध्यक्षस्थानी अखिल भारतीय तंत्र शिक्षण परिषदेचे माजी अध्यक्ष डॉ. एस. एस. मंथा असून, समितीमध्ये १५ तज्ज्ञ, अधिकाऱ्यांचा समावेश आहे. सदस्य म्हणून व्यवसाय शिक्षण व प्रशिक्षण संचालक, कौशल्य विकास आयुक्त, वीरमाता जिजाबाई टेक्नॉलॉजिकल इन्स्टिट्यूटचे उपसंचालक एस. जी. भिरूड, ग्लोबल टीचर पुरस्कारविजेते शिक्षक रणजितसिंह डिसले, भोपाळच्या पं. सुंदरलाल शर्मा सेंट्रल इन्स्टिट्यूट फॉर व्होकेशनल एज्युकेशनचे दोन प्रतिनिधी, उच्च शिक्षण संचालक, तंत्रशिक्षण संचालक, शालेय शिक्षण संचालक, महाराष्ट्र राज्य माध्यमिक व उच्च माध्यमिक शिक्षण मंडळाचे अध्यक्ष, महाराष्ट्र राज्य कौशल्य विकास मंडळाचे अध्यक्ष, कौशल्य क्षेत्रातील दोन तज्ज्ञ डॉ. श्रीकांत पाटील आणि सिंबायोसिस कौशल्य विद्यापीठाचे कुलगुरू डॉ. अश्विनी कुमार शर्मा यांचा समावेश आहे. कौशल्य व ज्ञान ही आर्थिक वृद्धी आणि सामाजिक विकासाची प्रेरकशक्ती आहेत. उच्चस्तरावरील व उत्तम दर्जाची कौशल्ये असलेले प्रदेश हे देशांतर्गत व आंतरराष्ट्रीय रोजगार बाजारातील आव्हानांशी व संधीशी अधिक परिणामकारकपणे जुळवून घेतात. वेग, दर्जा, गुणवत्ता व शाश्वतता या प्रमाणात कौशल्यविषयक आव्हाने पूर्ण करणे हे प्राथमिक ध्येय आहे, असे मलिक याबाबत म्हणाले.

from Career News in Marathi: Career News, मराठी Career बातम्या | Maharashtra Times https://ift.tt/3cR1ZC6
via IFTTT