मुंबई विद्यापीठात अधिकारी, कर्मचाऱ्यांची ६६९ पदे रिक्त

म. टा. विशेष प्रतिनिधी मुंबई : मुंबई विद्यापीठातील रिक्त पदे भरण्याची कोणतीही प्रक्रिया विद्यापीठ तसेच शासन स्तरावरून होत नसून, विद्यापीठातील आकृतीबंध पदांपैकी सुमारे ६६९ पदे रिक्त असल्याची बाब समोर आली आहे. मुंबई विद्यापीठाचा कारभार दिवसागणिक वाढत असून, संलग्न कॉलेजांची संख्या आता सुमारे ९००पर्यंत पोहोचली आहे. या कॉलेजांचे कामकाज सांभाळण्यापासून ते विद्यार्थ्यांशी संबंधित कामे करण्यासाठी मोठ्या संख्येने अधिकारी आणि कर्मचारी वर्गाची गरज आहे. असे असताना पूर्वीच्या कॉलेजांच्या संख्येच्या आधारे काढलेल्या आकृतीबंधानुसारही विद्यापीठातील कर्मचारी आणि अधिकाऱ्यांची संख्या अपुरीच असल्याने विद्यापीठाला कामकाज चालवणे अवघड होऊ लागले आहे. विद्यापीठात विविध स्तरावरील १३१९ अशैक्षणिक पदांना मान्यता आहे. यापैकी सुमारे ४५५ पदे रिक्त आहेत. यात सर्वाधिक लिपिक स्तरावरील सुमारे ४५ पदे रिक्त आहेत. यामुळे अनेक कामे खोळंबत असल्याचा अनुभव कॉलेजांना येत आहे. याबाबत विद्यापीठाने तातडीने कार्यवाही करावी, अशी मागणी अधिसभा सदस्य वैभव नरवडे यांनी केली आहे. प्राध्यापक, सहाय्यक प्राध्यापक आणि सहयोगी प्राध्यापक अशी २१४ पदे रिक्त आहेत. यामुळे पदव्युत्तर पदवी शिक्षण घेणाऱ्या विद्यार्थ्यांच्या अध्यापनावर परिणाम होत आहे. आता विद्यापीठाने पुढील कार्यवाही करणे आवश्यक आहे. ही कार्यवाही लवकरच होईल आणि विद्यापीठाच्या विभागांची परिस्थिती सुधारेल, अशी अपेक्षा व्यक्त होत आहे. प्राध्यापकांसाठी सरकारची मान्यता काही दिवसांपूर्वीच विद्यापीठाच्या पदव्युत्तर पदवी विभागाच्या दुरवस्थेबाबत 'मटा'मध्ये वृत्त प्रसिद्ध करण्यात आले होते. प्राध्यापक स्तरावरची ६९, सहाय्यक प्राध्यापक पदाची ७८ तर सहयोगी प्राध्यापकांची ६७ पदे रिक्त असल्याची माहिती विद्यापाठानेच अधिसभा सदस्य वैभव नरवडे यांच्या प्रश्नाला उत्तर देताना दिली आहे. प्राध्यापकांची ही २१४ पदे भरण्यासाठी शासनाने मान्यता दिली आहे.

from Career News in Marathi: Career News, मराठी Career बातम्या | Maharashtra Times https://ift.tt/3luwIZA
via IFTTT