शिक्षक असावा तर असा! ऑनलाइन वर्गासाठी बनवले १२७ व्हिडिओ

म. टा. वृत्तसेवा, ठाणे करोनाच्या महामारीने सर्वत्र कल्लोळ माजला असताना त्यातून शिक्षण क्षेत्रही सुटले नाही. २३ मार्चपासून संपूर्ण महाराष्ट्रात लॉकडाउन सुरू झाला अन् शाळा बंद झाल्या. ते सत्र तसेच संपले. १५ जूनपासून नवीन सत्राला सुरुवात झाली. शाळा बंद आणि विद्यार्थी, शिक्षक घरी, अशी स्थिती. अशावेळी विद्यार्थ्यांशी संपर्क साधायचा तर तो ऑनलाइन पद्धतीनेच. त्यानंतर शिक्षणाचे धडे देण्यासाठी राहनाळ येथील शिक्षक अजय पाटील यांनी शाळेतील विद्यार्थ्यांसाठी १५ जुलैपासून ऑनलाइन वर्ग सुरू केले. त्यांनी आतापर्यंत १२७ शैक्षणिक व्हिडीओ बनवले आहेत. शाळा-कॉलेज बंद झाल्यामुळे शैक्षणिक सत्र सुरू ठेवण्यासाठी ऑनलाइनशिवाय पर्याय नव्हता. सुरुवातीला अनेक समस्या आल्याने ऑनलाइन वर्गाला अत्यंत अल्पसा प्रतिसाद मिळाला. परंतु त्यावर मात करत अजय पाटील यांनी झू अॅप, गुगल मीटद्वारे ऑनलाइन वर्ग सुरू केले. ऑनलाइनच्या बरोबरच तांत्रिकदृष्ट्या सक्षम होण्याच्या निमित्ताने पहिली ते आठवीच्या विद्यार्थ्यांसाठी विषयवार व्हिडिओ बनवण्यास त्यांनी सुरुवात केली. त्यासाठी त्यांनी स्वतः एडिटिंग, रेकॉर्डिंग ही तांत्रिक अंगे शिकून घेतली. मराठी, हिंदी, इंग्रजी, इतिहास, भूगोल, विज्ञान या विषयावरचे व्हिडिओ बनवले. त्याला अतिशय चांगला प्रतिसाद मिळू लागला. अगदी सुरुवातीला पाटील सरांनी राहनाळ शाळेतील मुलांसाठी हे व्हिडीओ वापरले. मुलांचा प्रतिसाद उत्तम मिळाल्याने इतर शाळेतल्या विद्यार्थ्यांना हे व्हिडीओ युट्यूब चॅनलद्वारे उपलब्ध करून दिले. व्हिडीओ तयार करण्यासाठी राजेंद्र मारुती पाटील, विद्या शिर्के, मनिषा गामणे, नीता मोरे, जयश्री कदम, चंद्रकला काबूकर, विस्तार अधिकारी संजय अस्वले, रवींद्र तरे, सुचिता आरज, करणसिंह राजपूत, ज्योती धुमाळ, शारदा वाहाणे हे शिक्षक पुढे आले. या शिक्षकांच्या मदतीने पाटील यांनी अनेक शैक्षणिक व्हिडीओ बनवले. तसेच राष्ट्रपुरुषांची यशोगाथा सांगणारे माहितीपट तयार केले. शिष्यवृत्ती परीक्षेची तयारी कशी करावी याचे मार्गदर्शन करणारे व्हिडीओ बनवले. क्रमिक पुस्तकांतील पाठ, कविता लिहिणारे लेखक, कवी यांच्याबरोबर थेट संपर्क साधून त्यांनी विद्यार्थ्यांबरोबर बोलावे, त्यांनी लिहिलेल्या कविता, धडे यामागील भाव काय आहे, हे त्यांच्याच शब्दातून सांगावे या पद्धतीचा उपक्रम सुरू केला. त्यालाही चांगला प्रतिसाद मिळाला. या लॉकडाउनच्या काळात पाटील यांनी इतर सहकारी शिक्षकांना सोबत घेऊन तयार केलेले व्हिडीओ लक्ष्मी चित्र या यूट्युब चॅनलवर प्रसारित करून हजारो विद्यार्थ्यांपर्यंत पोहोचण्याचा सातत्याने प्रयत्न केला.

from Career News in Marathi: Career News, मराठी Career बातम्या | Maharashtra Times https://ift.tt/2NZqyo8
via IFTTT