'आयटीआय'कडे मुलींचा घटता ओघ

‌म. टा. विशेष प्रतिनिधी, मुंबई राज्यातील विद्यार्थ्यांना कौशल्य शिक्षण मिळावे या उद्देशाने आयटीआयचे शिक्षण देण्यात येते. यामध्ये मुलींनीही सहभागी व्हावे म्हणून विविध योजना आखण्यात आल्या आहेत. यानुसार मुलींची प्रवेशसंख्या वाढली. मात्र, मागील तीन वर्षांपासून मुलींचा ओघ घटत असल्याचे समोर आले आहे. राज्यातील मुली आर्थिकदृष्ट्या अधिकाधिक सक्षम व्हाव्यात यासाठी त्यांना कौशल्यक्षम अभ्यासक्रम उपलब्ध करून देण्यासाठी प्रयत्नशील आहे. मुलींसाठी असलेल्या विशेष अभ्यासक्रमांबरोबरच मुलांचे वर्चस्व असलेल्या अभ्यासक्रमामध्ये मुलींना प्रवेश दिला जात आहे. मात्र, मागील तीन वर्षांपासून आयटीआयच्या अभ्यासक्रमांकडील मुलींचा ओढा कमी होताना दिसत आहेत. २०१८ मध्ये आयटीआयच्या विविध अभ्यासक्रमांना २१ हजार २२२ मुलींनी प्रवेश घेतला होता. मात्र २०१९ मध्ये हीच संख्या १८ हजार ८९५ इतकी कमी झाली. तर २०२१ मध्ये अवघ्या १६ हजार ८३७ विद्यार्थींनी आयटीआयच्या विविध अभ्यासक्रमांना प्रवेश घेतला. म्हणजेच दरवर्षी सरासरी दोन हजार विद्यार्थींनी आयटीआयच्या प्रवेशाकडे पाठ फिरवल्याचे आकडेवारीवरून दिसून येत आहे. ड्रेस मेकिंग, कम्प्युटर ऑपरेटर, कॉस्मेटोलॉजी, फॅशन टेक्नोलॉजी, सिविंग टेक्नोलॉजी, स्टेनोग्राफी आणि सेक्रेटरिअल असिस्टंट यासारख्या महिलाप्रधान अभ्यासक्रमांकडेही विद्यार्थींनी पाठ फिरवली आहे. सन २०१८ मध्ये महिलाप्रधान अभ्यासक्रमांना ११ हजार ३०५ विद्यार्थिंनींनी प्रवेश घेतले होते. सन २०१९मध्ये यात घट होऊन १० हजार ७९६ विद्यार्थिंनीनी प्रवेश घेतले. तर २०२०च्या प्रवेश प्रक्रियेमध्ये विद्यार्थिनींनी १० हजाराचा टप्पाही ओलांडला नाही. सन २०२०मध्ये फक्त ९ हजार ६७५ विद्यार्थिंनीच प्रवेश घेतले. वर्ष -- प्रवेश २०१८ -- २१,२२२ २०१९ -- १८,८९५ २०२० -- १६,८३७ महिलाप्रधान विषयनिहाय प्रवेश अभ्यासक्रम -- २०१८ -- २०१९ -- २०२० ड्रेस मेकिंग -- ३४१० -- ३०८२ --२८३९ कोपा -- २९२५ -- २६०१ -- २१८४ कॉस्मोटोलॉजी -- १८५८ -- १८२४ -- १७०८ सिविंग टेक्नोलॉजी -- १८२५ -- १७५५ -- १७०७ फॅशन टेक्नोलॉजी -- ९७२ -- ९१४ -- ९६१ स्टेनो अ‍ॅण्ड सेक्रेटरियल -- ३१५ -- ३२० -- २७६

from Career News in Marathi: Career News, मराठी Career बातम्या | Maharashtra Times https://ift.tt/3cNaXQK
via IFTTT