विद्यापीठाचे साक्षांकन ऑनलाइन; परदेशी जाणाऱ्या विद्यार्थ्यांना मोठा दिलासा

म. टा. विशेष प्रतिनिधी विद्यार्थ्यांना परदेशात जाण्यासाठी आवश्यक असलेल्या ट्रान्सक्रीप्टचे साक्षांकन करताना मुंबई विद्यापीठात वेळ वाया जात असे. यामुळे अनेक विद्यार्थ्यांची संधीही हुकत असे. विद्यार्थ्यांना अनेक खेपा घातल्यानंतर साक्षांकित प्रती उपलब्ध होत होत्या. यावर अखेर विद्यापीठाने तोडगा काढला असून, ही सर्व प्रक्रिया ऑनलाइन करण्यात आली आहे. यामुळे वर्षाला साक्षांकित करून घेणाऱ्या १५ हजार विद्यार्थ्यांना दिलासा मिळाला आहे. मुंबई विद्यापीठामध्ये पदवी मिळवलेल्या विद्यार्थ्यांची गुणपत्रिका आणि ट्रान्सक्रीप्टचे साक्षांकन करण्याचे काम विद्यार्थी विकास विभागामध्ये केले जाते. ज्या विद्यार्थ्यांना परदेशात शिकायला जायचे आहे, त्या विद्यार्थ्यांना तेथील कायमचे रहिवासी होण्यासाठी किंवा प्रवेशासाठी या साक्षांकनाची गरज लागते. यासाठी दरवर्षी विभागात १५ हजार विद्यार्थ्यांचे अर्ज येतात. यात अनेक विद्यार्थ्यांना किंवा त्यांच्या नातेवाईकांना मूळ प्रमाणपत्र घेऊन विद्यार्थी विकास विभागात यावे लागत असे. मूळ प्रमाणपत्र तपासून आवश्यक ते कागदपत्र सादर केल्यानंतर पुढील प्रक्रिया होत असे व त्यानंतर आठवडाभराने पुन्हा कागदपत्र घेऊन यावे लागत होते. कधी कधी या कामांना १५ ते २० दिवसही लागत असे. त्यावेळी विद्यापीठात तीन ते चार खेपा घालाव्या लागत असे. ही वेळखाऊ प्रक्रिया ऑनलाइन व्हावी, अशी मागणी गेल्या अनेक वर्षांपासून होत होती. याची दखल घेऊन विद्यापीठाने ही प्रक्रिया ऑनलाइन केली आहे. यामुळे विद्यार्थी घरी बसून ऑनलाइन कागदपत्रे सादर करू शकतो. विद्यार्थी विकास विभाग कागदपत्रांची सत्यता पडताळणी विद्यार्थ्यांच्या कॉलेजकडून, विद्यापीठ विभागाकडून करून घेईल व ती कागदपत्रे परदेशातील संस्थांकडे पाठविले जातील. या सुधारित प्रक्रियेमुळे विद्यार्थ्यांचा वेळ आणि पैसा याची बचत झाल्याचे विद्यापीठातर्फे सांगण्यात येते. असा मिळणार लाभ - ऑनलाइन विद्यार्थी नोंदणी - ई-मेलद्वारे सत्यता पडताळणी - ऑनलाइन पेमेंट - अर्ज ट्रॅकिंगची सुविधा - हेल्पलाइन सुविधा - शैक्षणिक कागदपत्रांचे साक्षांकन, सत्यता पडताळणी

from Career News in Marathi: Career News, मराठी Career बातम्या | Maharashtra Times https://ift.tt/3sabH9i
via IFTTT