गाइडची साथ, मित्रांची सोबत...ऑनलाइन परीक्षांची अवस्था

म. टा. विशेष प्रतिनिधी मुंबई : दहावी व बारावीच्या विद्यार्थ्यांचा लिखाण सराव व्हावा या उद्देशाने अनेक शाळांनी विद्यार्थ्यांची ऑनलाइन सराव परीक्षा घेतली. यानंतर विद्यार्थ्यांची उत्तरपत्रिका पाहून सारे शिक्षक थक्क झाले. कारण प्रत्येक विद्यार्थ्याला ९०हून अधिक गुण मिळाले होते. करोनाकाळात विद्यापीठांच्या परीक्षा ऑनलाइन घेण्याचा निर्णय झाला. यानंतर प्रत्येक विद्याशाखेचा निकाल हा ९५ टक्क्यांच्या वर लागला. यामुळे विद्यार्थ्यांच्या खऱ्या गुणवत्तेचा प्रश्न समोर आला. असाच काहीसा प्रकार सध्या शाळा व ज्युनिअर कॉलेजांमध्ये पाहावयास मिळत आहे. तेथे सुरू असलेल्या सराव परीक्षांचे निकाल पाहून सारेच शिक्षक आश्चर्यचकित झाले आहेत. करोनाचा प्रादूर्भाव झाल्यामुळे बंद झालेल्या शाळा अद्याप प्रत्यक्ष सुरू झालेल्या नाहीत. विद्यार्थ्यांचे शिक्षण पूर्णपणे ऑनलाइन सुरू होते. यामुळे ऑफलाइन परीक्षा देताना विद्यार्थ्यांचा लिखाण सराव नसेल, अशी भीती व्यक्त होत होती. १५ फेब्रुवारीपासून बहुतांश शाळांमध्ये सराव परीक्षा घेण्यात आल्या. यासाठी विद्यार्थ्यांना व्हॉट्सअॅपवर प्रश्नपत्रिका पाठवण्यात आल्या होत्या. त्यानंतर उत्तरपत्रिका मोबाइलवर स्कॅन करून पाठविण्यास सांगण्यात आले. या उत्तरपत्रिका प्राप्त झाल्यानंतर शिक्षकांच्या असे लक्षात आले की विद्यार्थ्यांनी शालेय पुस्तकांव्यतिरिक्त मार्गदर्शक पुस्तकांमधील उत्तरे जशीच्या तशी उतरवली आहेत. इतकेच नव्हे तर निबंधही पुस्तकातून जसाचा तसा लिहिल्याचे समोर आले. काही विद्यार्थ्यांनी गटांमध्ये बसून उत्तरपत्रिका सोडविल्याचे स्पष्ट झाले. यानंतर काही शाळांनी गुगलचा वापर करून प्रॉक्टेड पद्धतीने परीक्षांचे नियोजन केले. मात्र त्यातही विद्यार्थी कॉपी करताना दिसले. तसेच या पद्धतीमधील परीक्षेला १०० टक्के उपस्थिती नव्हती. राज्य शिक्षण मंडळाने ऑनलाइन परीक्षा घेण्याचा निर्णय घेतलाच, तर गैरप्रकार रोखण्यासाठी कठोर उपाययोजना कराव्या लागतील, असे मत एका मुख्याध्यापकांनी व्यक्त केले. पालकांचे प्रबोधन शाळा आता पालकांचे प्रबोधन करत असून, विद्यार्थ्यांना न बघता उत्तरे लिहिण्यास प्रवृत्त करावे व तुम्हीच पर्यवेक्षकाची भूमिका बजावावी, असे सांगण्यात येत आहे. यानंतर पुढील टप्प्यात होणाऱ्या सराव परीक्षांमध्ये काही फरक जाणवतोय का याकडे आमचे लक्ष असल्याचेही मुख्याध्यापकांनी सांगितले.

from Career News in Marathi: Career News, मराठी Career बातम्या | Maharashtra Times https://ift.tt/3qCCLfR
via IFTTT