'ओन्ली एमपीएससी'साठी विद्यार्थी एकवटले

म. टा. प्रतिनिधी, पुणे राज्य सरकारच्या सर्व विभागांमधील रिक्त पदे महाराष्ट्र लोकसेवा आयोगाने (एमपीएससी) परीक्षा घेऊन भराव्यात, अशी मागणी राज्यातील स्पर्धा परीक्षांचा अभ्यास करणाऱ्या उमेदवारांनी केली आहे. राज्य सरकारने 'एमपीएससी'ची रिक्त पदे तातडीने भरून पदभरती परीक्षेच्या प्रक्रियेला तत्काळ सुरुवात करावी, अशी मागणी करण्यात आली आहे. एमपीएससी समन्वय समिती आणि एमपीएसी स्टुडंट राइट्स या संघटनांनीही निवेदनाद्वारे राज्य सरकारकडे मागणी केली आहे. राज्य सरकारने सरकारी विभागांमधील गट ब (अराजपत्रित) आणि गट क संवर्गाची पदभरती करण्यासाठी 'महाआयटी'ची नेमणूक केली आहे. 'महाआयटी'ने या पदभरतीची जबाबदारी निविदा प्रक्रियेद्वारे खासगी आयटी कंपन्यांना दिली. मात्र, या कंपन्यांकडे मोठ्या स्तरावर होणाऱ्या परीक्षा नियोजनाचा अनुभव नाही; तसेच सक्षम यंत्रणा नसल्याने परीक्षांमध्ये गोंधळ आणि गैरप्रकार होत आहेत. त्याचप्रमाणे परीक्षेसाठी निवडडेल्या कंपन्या ब्लॅक लिस्टेड आहेत, अशी तक्रारही करण्यात आली आहे. गेल्या रविवारी झालेल्या आयोग्य विभागाच्या पदभरती परीक्षेमध्ये अभूतपूर्व गोंधळ झाला; तसेच अनेक ठिकाणी गैरप्रकारही झाले. यामुळे राज्यभरातील उमेदवारांनी संताप व्यक्त केला असून, पदभरतीच्या सर्व परीक्षा 'एमपीएससी'तर्फे घेण्यात याव्यात, अशी मागणी केली आहे. सर्व पदभरती परीक्षांचे नियोजन कमी कालावधीत करण्यासाठी 'एमपीएससी'ला सक्षम करण्याची आवश्यकता आहे. अशा परिस्थिती 'एमपीएससी'च्या प्रशासनातील रिक्त पदे तातडीने भरण्याची आवश्यकता असल्याचे उमेदवारांनी सांगितले. पदभरतीच्या परीक्षा 'एमपीएससी'द्वारे घेण्यासाठी राज्यातील उमेदवारांनी सोशल मीडियावर पाठपुरावा करण्याचे आवाहन एमपीएसी स्टुडंट राइट्सतर्फे महेश बढे यांनी केले आहे. हॅशटॅग मोहिमेत सहभागी होण्याचे आवाहन सरकारी पदभरतीच्या परीक्षा केवळ 'एमपीएससी'ने घ्याव्यात यासाठी एमसीएससी समन्वय समितीने ही हॅशटॅग मोहिम उद्या, शुक्रवारी (५ मार्च) दुपारी चार ते सायंकाळी आठ वाजेपर्यत सोशल मीडियावर राबवण्याचे आवाहन केले आहे. पारदर्शक व भ्रष्टाचारमुक्त परीक्षांसाठी राज्यातील सर्व उमेदवारांनी एकत्रित येण्याचे आवाहन समितीकडून करण्यात आले आहे.

from Career News in Marathi: Career News, मराठी Career बातम्या | Maharashtra Times https://ift.tt/3v38470
via IFTTT