MPSC पूर्व परीक्षा: राज्यात विविध ठिकाणी आंदोलनाची ठिणगी

महाराष्ट्र लोकसेवा आयोगाची येत्या १४ मार्च २०२१ रोजी होणारी पूर्व परीक्षा लांबणीवर टाकण्याचा निर्णय लोकसेवा आयोगाने गुरुवारी दुपारी जाहीर केला. त्यानंतर राज्यभरात एमपीएससी उमेदवारांनी एल्गार केला. परीक्षेचे अॅडमिट कार्डही जारी झालेले असताना, ऐन परीक्षेच्या दोन दिवस आधी राज्य सरकारने परीक्षा पुढे ढकलण्याचा निर्णय घेतल्याने विद्यार्थी संतापले. पुण्यातून सुरू झालेल्या आंदोलनाचे पडसाद पुढे कोल्हापूर, नागपूर, औरंगाबाद, सांगली आणि जळगाव शहरांमध्ये उमटले. पुणे येथे मोठ्या प्रमाणावर एमपीएससीची तयारी करणारे उमेदवार राहत असतात. घरापासून शेकडो मैल दूर येऊन, कुठेतरी मेस लावून परीक्षेची तयारी करत असतात. राज्यातल्या अन्य शहरांमध्येही अशीच परिस्थिती असते. हे उमेदवार गेली अनेक वर्षे परीक्षेची तयारी करत आहेत.एकीकडे बेरोजगारी, दुसरीकडे त्यांची वये वाढत असतात आणि परीक्षा तोंडावर आली म्हणताच ती लांबणीवर पडते हे चित्र हे विद्यार्थी गेले वर्षभर पाहात आहेत. त्यातूनच आज पाचव्यांदा ही परीक्षा पुढे ढकलल्याचे वृत्त कळताच या विद्यार्थ्यांच्या संतापाचा उद्रेक झाला. परिपत्रक आल्याशिवाय मागे हटणार नाही राज्य सरकार जोवर परीक्षा लांबणीवर टाकण्याचा निर्णय मागे घेत नाही आणि यासंबंधीत परिपत्रक आयोग जारी करत नाही, तोवर मागे हटणार नाही अशी या उमेदवारांची भूमिका आहे. भाजप आमदार पडळकर आंदोलनात पुणे येथे सुरू असलेल्या आंदोलनात भाजप आमदार गोपीचंद पडळकर उतरले. राज्यात बँकिंगच्या परीक्षा, यूपीएससी परीक्षा, बोर्डाच्या परीक्षा होत आहेत, तर केवळ एमपीएससीचीच परीक्षा आयोजित न करण्यामागे काय कारण आहे, असा सवाल भाजप आमदार गोपीचंद पडळकर यांनी केला आहे. करोना संक्रमण आहे तर भलेही या उमेदवारांना पीपीई किट घालून परीक्षा देऊ द्या, पण परीक्षा रद्द करू नका, अशी मागणी पडळकर यांनी यावेळी केली. रोहित पवार यांचा विद्यार्थ्यांना पाठिंबा राष्ट्रवादीचे आमदार रोहित पवार यांनी विद्यार्थ्यांना पाठिंबा दर्शवत राज्य सरकारने परीक्षा लांबणीवर टाकायला नको होती, अशी भूमिका घेतली. हे आपले वैयक्तिक मत आहे, मात्र सरकारने करोनाची पार्श्वभूमी लक्षात घेऊन हा निर्णय घेतला असल्याचे त्यांनी वृत्तवाहिन्यांना सांगितले. युवक काँग्रेस उमेदवारांसोबत युवक काँग्रेसने या निर्णयाचा निषेध केला आहे. ‘राज्य सरकारने यामध्ये हस्तक्षेप करून निर्णयाचा फेरविचार करावा,’ अशी मागणी युवक काँग्रेसचे प्रदेशाध्यक्ष सत्यजित तांबे यांनी केली आहे. या निर्णयाचा निषेध म्हणून नगरमध्ये शहर काँग्रेसच्या पुढाकारातून दिल्ली गेट येथे मोर्चा काढण्यात आला. जळगावातही पडसाद जळगावातील परिक्षेची तयारी करणाऱ्या शेकडो विद्यार्थ्यांनी आज गुरुवारी दुपारी ४ वाजता जळगावातील कोर्ट चौकात एकत्र येत रास्ता रोको आंदोलन केले. विद्यार्थ्यांच्या आक्रमकतेमुळे पोलिस प्रशासनाची चांगलीच दमछाक झाली तासभर पोलिसांनी या विद्यार्थ्यांची समजूत काढली. या आंदोलनामुळे शहरातील वाहतूक ठप्प झाली होती. मराठा क्रांती मोर्चाकडून सरकारच्या निर्णयाचं स्वागत मराठा क्रांती मोर्चाने राज्य सरकारच्या पुढे ढकलण्याच्या निर्णयाचं स्वागत करण्यात आलं आहे. मराठा आरक्षणाबाबत निर्णय होत नाही तोपर्यंत राज्य सरकारने एमपीएससी परीक्षा घेऊ नये, अशी मराठा क्रांती मोर्चाची मागणी होती. एमपीएससीचीच परीक्षा का होत नाही? एकीकडे आठवडाभरापूर्वी आरोग्य विभागाची भरती परीक्षा झाली, यूपीएससी, जेईई, बँकिंग अशा सर्व परीक्षा होत असताना केवळ एमपीएससी पूर्व परीक्षाच लांबणीवर का टाकण्यात येत आहे, असा संतप्त विद्यार्थ्यांचा सवाल होता. एमपीएसी परीक्षेचे अॅडमिट कार्ड जारी झाले, मार्गदर्शक सूचना आल्या आणि आयत्या वेळी परीक्षा स्थगित करण्यात आल्याने विद्यार्थ्यांच्या संतापाला तोंड फुटले.

from Career News in Marathi: Career News, मराठी Career बातम्या | Maharashtra Times https://ift.tt/30ECMoJ
via IFTTT