म. टा. विशेष प्रतिनिधी मुंबई/पुणे करोनामुळे गेले वर्षभर संयम राखून असलेल्या एमपीएससी परीक्षा देऊ इच्छिणाऱ्या विद्यार्थ्यांच्या संतापाचा गुरुवारी कडेलोट झाला. वाढत्या संसर्गामुळे १४ मार्चला होणारी परीक्षा अनिश्चित काळासाठी पुढे ढकलण्यात येत असल्याचे महाराष्ट्र लोकसेवा आयोगाकडून जाहीर करण्यात आल्यानंतर पुण्यासह राज्याच्या विविध भागांत विद्यार्थ्यांचा उद्रेक झाला. परिस्थितीचे गांभीर्य लक्षात आल्यानंतर सरकार खडबडून जागे झाले आणि गुरुवारी रात्री मुख्यमंत्र्यांनी येत्या आठ ते दहा दिवसांत या परीक्षा घेण्याचे वचन विद्यार्थ्यांना दिले. तसेच नव्या तारखा आज, शुक्रवारीच जाहीर केल्या जातील, असे सांगत त्यांनी परीक्षार्थींना आश्वस्त करण्याचा प्रयत्न केला. परीक्षा पुढे ढकलल्याने कोणत्याही विद्यार्थ्याचे वयोमर्यादेमुळे नुकसान होणार नाही, अशी हमीही त्यांनी दिली. परीक्षेच्या नव्या नियोजनाबाबत मुख्य सचिव तसेच आयोगाच्या अधिकाऱ्यांना स्पष्ट निर्देश दिले असल्याचे सांगत मुख्यमंत्री म्हणाले, ‘करोनाच्या वाढत्या प्रादुर्भावामुळे विद्यार्थ्यांच्या आरोग्याची सुरक्षितता लक्षात घेऊन केवळ काही दिवसांसाठी ही परीक्षा पुढे ढकलली आहे. विद्यार्थी ज्या ठिकाणी परीक्षा देणार आहेत ती परीक्षास्थळे, परीक्षा घेणारा कर्मचारी वर्ग सुरक्षित आहे का हे पाहणे आवश्यक आहे. जे कर्मचारी पेपर वाटणार, पर्यवेक्षण करणार त्यांची करोना चाचणी झाली आहे का, त्यांनी प्रतिबंधक लस घेतली आहे का, याची तपासणी करणे आवश्यक आहे. त्यासाठीच हा अधिकचा कालावधी घेतल्याचे त्यांनी सांगितले. विद्यार्थ्यांच्या आरोग्याशी खेळ होऊ नये म्हणून हा निर्णय घेण्यात आल्याचे सांगताना मुख्यमंत्र्यांनी विद्यार्थ्यांना कुठल्याही संभ्रमात न राहता, भ्रामक विचारांना बळी न पडता संयम बाळगण्यास सांगितले. तर विद्यार्थ्यांच्या भावनांशी आणि आरोग्याशी खेळू नका असे विरोधकांनाही आवाहन केले. पुण्यात ठिय्या येत्या रविवारी १४, मार्चला होणारी राज्यसेवा पूर्व परीक्षा पुढे ढकलण्याचे गुरुवारी दुपारी जाहीर केल्यानंतर, पुण्यात लालबहाद्दूर शास्त्री रस्त्यावर विद्यार्थ्यांचा उद्रेक झाला. या उद्रेकाचे लोण राज्यात कोल्हापूर, औरंगाबाद, नागपूर, नगर आदी शहरांमध्ये पसरले होते. मुख्यमंत्र्यांच्या या माहितीनंतरही परीक्षा नियोजित वेळापत्रकाप्रमाणे घेण्यासाठी रात्री साडेनऊ वाजेपर्यत विद्यार्थ्यांचे ठिय्या आंदोलन सुरू होते. पुण्यातील लालबहाद्दूर शास्त्री रस्त्यावर दुपारी दोन ते रात्री साडेनऊ वाजेपर्यत ठिय्या आंदोलन करून सरकारच्या विरोधात घोषणा दिल्या; तसेच राज्यसेवा पूर्व परीक्षा नियोजित वेळापत्रकाप्रमाणे रविवारी घेण्याची मागणी लावून धरली. विद्यार्थ्यांच्या या मागणीला आमदार गोपीचंद पडळकर, राम सातपुते या आमदारांनी प्रत्यक्ष पाठिंबा दिला. याशिवाय ‘ट्‌वीटर’वर अनेक लोकप्रतिनिधींनी विद्यार्थ्यांच्या मागणीला पाठिंबा दिल्यानंतर, मुख्यमंत्री ठाकरे यांनी ‘फेसबुक लाइव्ह’द्वारे परीक्षेबाबत माहिती दिली. ठाकरे यांच्या फेसबुक लाइव्हनंतर, पोलिसांनी रस्ता मोकळा करण्यास सुरुवात केली. मात्र, परीक्षा नियोजित वेळापत्रकाप्रमाणे रविवारी घेण्यात यावी, या मागणीसाठी आमदार गोपीचंद पडळकर आणि काही विद्यार्थी रात्री उशिरापर्यत आंदोलन करीत होते. त्यानंतर पोलिसांनी पडळकर यांना ताब्यात घेउन रस्ता मोकळा केला. दरम्यान, सूत्रांच्या मते २१ मार्च रोजी ही परीक्षा होण्याची शक्यता आहे.


from Career News in Marathi: Career News, मराठी Career बातम्या | Maharashtra Times https://ift.tt/30CgSTm
via IFTTT