मुंबई विद्यापीठाचे स्थलांतर प्रमाणपत्र आता घरबसल्या मिळणार

म. टा. विशेष प्रतिनिधी, मुंबई मुंबई विद्यापीठातील अनेक विद्यार्थी देशविदेशात शिक्षणासाठी जातात. मात्र अनेकदा त्यांना मिळण्यात येत असलेल्या अडचणींमुळे त्यांना आर्थिक व मानसिक फटका सहन करावा लागतो. स्थलांतर प्रमाणपत्र वेळेवर न मिळाल्याने व त्यातील तांत्रिक चुकांमुळे बऱ्याच विद्यार्थ्यांना १० हजारांपर्यंत दंड सहन करावा लागतो. या पार्श्वभूमीवर विद्यार्थ्यांचा त्रास कमी करण्यासाठी त्यांना ऑनलाइन स्थलांतर प्रमाणपत्र देण्याची युवासेनेच्या मागणीला शुक्रवारी विद्यापीठाच्या व्यवस्थापन परिषदेच्या सभेत मंजूर देण्यात आली. या निर्णयाचा फायदा अनेक विद्यार्थ्यांना होणार असून, त्यांना घरबसल्या स्थलांतर प्रमाणपत्र मिळण्याचा मार्ग मोकळा झाला आहे. विद्यार्थ्यांना उच्च शिक्षणासाठी इतर विद्यापीठांत किंवा परदेशी शिक्षण संस्थेत प्रवेश घेण्याकरिता स्थलांतर प्रमाणपत्र अत्यावश्यक असते. हे प्रमाणपत्र २०० रुपये शुल्क आणि २० रुपये अर्ज शुल्क विद्यापीठात भरल्यानंतर काही दिवसांत विद्यार्थ्यांना मिळते. मात्र अनेकदा विद्यार्थ्यांना देण्यात येणाऱ्या प्रमाणपत्रांमध्ये विद्यापीठाकडून चुका करण्यात येतात. त्यामुळे विद्यार्थ्यांना चुका दुरुस्तीसाठी विद्यापीठामध्ये तीन ते चार फेऱ्या माराव्या लागतात. मुंबई विद्यापीठाची भौगोलिक व्याप्ती मुंबई, ठाणे, पालघर, रायगड, रत्नागिरी, सिंधुदुर्ग जिल्ह्यांपर्यंत आहे. त्यामुळे येथील विद्यार्थ्यांना हे प्रमाणपत्र मिळविण्यासाठी मुंबईत यावे लागते. यासाठी किमान दोन ते तीन हजार रुपये खर्च होतो, तसेच वेळेचा अपव्यय होऊन त्यांना मानसिक त्रासही सहन करावा लागतो. विद्यार्थ्यांना होणारा हा त्रास दूर करण्यासाठी युवासेना सचिव वरुण सरदेसाई यांच्या मार्गदर्शनाखाली युवासेना व्यवस्थापन परिषद सदस्य प्रदीप सावंत आणि राजन कोळंबेकर यांनी स्थलांतर प्रमाणपत्र ऑनलाइन देण्याची मागणी केली होती. त्यानुसार स्थलांतर प्रमाणपत्रासाठी ऑनलाइन अर्ज व शुल्क भरण्याबरोबरच विद्यार्थ्यांना घरपोच स्थलांतर प्रमाणपत्र देण्याला विद्यापीठाच्या व्यवस्थापन परिषदेच्या सभेने शुक्रवारी मंजुरी दिली. त्यामुळे आता विद्यार्थ्यांना घरबसल्या स्थलांतर प्रमाणपत्र मिळणे सोपे होणार आहे. विद्यार्थी देशविदेशात असला तरी त्या पत्त्यावर स्थलांतर प्रमाणपत्र विद्यापीठाकडून कुरियरमार्फत पाठवण्यात येणार आहे. यासाठी विद्यार्थ्यांना ५०० रुपये शुल्क भरावे लागणार असल्याची माहिती युवासेना व्यवस्थापन परिषदेचे सदस्य प्रदीप सावंत यांनी दिली.

from Career News in Marathi: Career News, मराठी Career बातम्या | Maharashtra Times https://ift.tt/3mysJMp
via IFTTT