वैद्यकीय परीक्षा पुढे ढकलण्याची मागणी

म. टा. प्रतिनिधी, औरंगाबाद महाराष्ट्र आरोग्य विज्ञान विद्यापीठातर्फे घेण्यात येणाऱ्या एमबीबीएस, बीडीएस आदी वैद्यकीय अभ्यासक्रमांच्या परीक्षा पुढे ढकलण्याची मागणी पुढे आली आहे. विद्यापीठातर्फे १९ एप्रिल ते ३० जून दरम्यान परीक्षा होणार आहेत. राज्यात करोनाचा वाढता प्रादुर्भाव, रुग्णांची वाढती संख्या पाहता परीक्षा पुढे ढकलण्याची मागणी लोकप्रतिनिधी, विद्यार्थी, संघटनांकडून होत आहे. खासदार सुप्रीया सुळे, राजीव सातव यांच्यासह आता आमदार सतीश चव्हाण यांनीही याबाबत परीक्षा पुढे ढकलण्याची मागणी केली आहे. याबाबत मुख्यमंत्री उद्धव ठाकरे, उपमुख्यमंत्री अजित पवार, वैद्यकीय शिक्षण मंत्री अमित देशमुख यांच्याकडे मागणी केली आहे. विद्यापीठाने जाहीर केलेल्या वेळापत्रकाप्रमाणे ऑफलाईन पध्दतीने वैद्यकीय शाखेच्या परीक्षा होणार असून कोविड आजाराविषयी आवश्यक ती सर्व खबरदारी घेऊन या परीक्षा होतील असे विद्यापीठाच्यावतीने सांगण्यात आले आहे. मात्र, सदरील परीक्षा देणारे अनेक विद्यार्थी आज करोनाबाधित आहेत. तर परीक्षेला बसता यावे म्हणून लक्षणे असून सुध्दा अनेक विद्यार्थी करोनाची चाचणी करत नसल्याचे निदर्शनास आले आहे. आज वैद्यकीय शिक्षण घेणारे अनेक विद्यार्थी घरी आहेत. या विद्यार्थ्यांना परीक्षेसाठी एका जिल्ह्यातून दुसर्‍या जिल्ह्यात जावे लागणार आहे. तसेच वसतिगृहात एका रूममध्ये तीन ते चार विद्यार्थी राहतात. मेस, वॉशरूमचा वापर या विद्यार्थ्यांना करावा लागणार आहे. त्यामुळे विद्यार्थ्यांमध्ये करोनाचा संसर्ग होण्याची शक्यता नाकारता येणार नाही. शिवाय अभ्यासिका देखील बंद असल्याने विद्यार्थ्यांना अभ्यासासाठी मोठी अडचण निर्माण होणार आहे.

from Career News in Marathi: Career News, मराठी Career बातम्या | Maharashtra Times https://ift.tt/3d7frTY
via IFTTT