वसुंधरा दिन विशेष: टेट्रापॅकपासून शाळेसाठी बनवणार बाक

म. टा. प्रतिनिधी, मुंबई वसुंधरा दिनाची यंदाची थीम पृथ्वीच्या पुनरुज्जीवनाची असून यासाठी रियुज, रिसायकल आणि रिड्युस या त्रिसूत्रीचा वापर करणे आवश्यक आहे. या पार्श्वभूमीवर 'कार्टन्स ले आओ, क्लासरूम बनाओ' या फ्लॅगशिप अभियानांतर्गत पाच लाख वापरलेल्या कार्टनपासून बाक बनवण्यात येणार आहेत. माहीम येथील महापालिकेच्या सिटी ऑफ लॉस एन्जेलिस शाळेला हे बाक भेट देण्यात येणार आहेत. टेट्रापॅकच्या माध्यमातून आरयूआर ग्रीनलाइफ, सहकारी भांडार आणि रिलायन्स फ्रेश यांच्या सहयोगातून हा उपक्रम राबवण्यात येत आहे. यासाठी ग्राहकांना 'वसुंधरा दिना'च्या निमित्ताने त्यांनी वापरलेले टेट्रा पॅक जवळच्या सहकारी भंडार किंवा रिलायन्स फ्रेश स्टोअरमध्ये आणून देण्याचे आवाहन करण्यात आले आहे. याशिवाय यासाठी २०० हून अधिक ठिकाणेही निश्चित करण्यात आली आहेत. कचऱ्याचे वर्गीकरण आणि पुनर्वापर यांबाबत जागरूकता निर्माण करण्यासाठी आयोजित या उपक्रमाला बृहन्मुंबई महानगरपालिकेने पाठिंबा दिला आहे. जी उत्तर प्रभागाचे सहाय्यक आयुक्त किरण दिघावकर यांनी या माध्यमातून विद्यार्थ्यांसाठी अध्ययनासाठी अधिक चांगले वातावरण निर्माण होण्यास मदत होईल, अशा आशावाद व्यक्त करताना मुंबईकरांकडून या उपक्रमाला पाठिंबा देण्याची अपेक्षा व्यक्त केली. लॉस एन्जेलिस ही महापालिकेतर्फे चालवली जाणारी पहिली सीबीएसई शाळा आहे. टेट्रापॅकने सन २०१० 'गो ग्रीन विथ टेट्रापॅक' हा उपक्रम सुरू केला होता. या उपक्रमाअंतर्गत टेट्रापॅक, कार्टन्स एकत्र करून त्याचे पुनर्चक्रीकरण केले जाते. त्यातून उद्यानातील, वर्गातील बाक तसेच इतर काही उपयुक्त वस्तू बनवल्या जातात. एक बाक तयार करण्यासाठी साधारण ११ हजार टेट्रापॅकचा उपयोग होतो. या माध्यमातून मुंबईमध्ये ३०० हून अधिक बाक आणि १ लाखाहून अधिक पुनर्चक्रीकृत उत्पादने देण्यात आली आहेत.

from Career News in Marathi: Career News, मराठी Career बातम्या | Maharashtra Times https://ift.tt/2Ph2SfK
via IFTTT