मुख्य लिपिक परीक्षा पुढे ढकला; भाजपसह कामगार संघटनांची मागणी

म. टा. विशेष प्रतिनिधी मुंबई : मुंबईत करोनाचा कहर वाढल्याने राज्य सरकारकडून मिनी लॉकडाउनपाठोपाठ संपूर्ण लॉकडाउनचे सावट उभे राहिले आहे. शहरात रुग्णसंख्येत वाढ होत असली, तरीही मुंबई पालिकेकडून विभागीय पातळीवरील मुख्य लिपिक, वरिष्ठ लेखा परीक्षक, लेखा सहाय्यक पदासाठी लेखी परीक्षा घेण्याचा अट्टहास सुरूच आहे. १६ ते १८ एप्रिल कालावधीत घेण्यात येणाऱ्या परीक्षेत पालिकेतील सुमारे २,७०० लिपिक सहभागी होणार आहे. मात्र, करोनाचा प्रादुर्भाव लक्षात घेऊन ही परीक्षा पुढे ढकलण्याची मागणी भाजपसह अन्य काही कामगार संघटनांनीही केली आहे. शहरात करोनाची स्थिती लक्षात घेऊन पालिका प्रशासनाने १६ ते १८ एप्रिल कालावधीतील परीक्षा पुढे ढकलावी, असे परीक्षार्थी लिपिकांचे म्हणणे आहे. या परीक्षेला बसणाऱ्या काही लिपिकांना करोनाची बाधा झाल्याने त्यांच्यासारखे अनेक लिपिक परीक्षेसाठी मुकण्याचीही भीती आहे. करोना कमी झाल्यानंतर काही कालावधीनंतर ही परीक्षा घेणे संयुक्तिक ठरेल, अशी भूमिका कामगार संघटनांनी घेतली आहे. मुख्य लिपिक परीक्षेसाठी मुंबई पालिकेतील विविध विभागातील लिपिकांना संधी असून त्यासाठी मोठा प्रतिसाद मिळाला आहे. या पदासाठी उपलब्ध असणाऱ्या जागांसाठी २,७०० लिपिकांनी परीक्षेत बसण्याची तयारी चालविली आहे. पण, करोनाचा सध्याचा संसर्ग पाहून अनेक लिपिकांनी त्याविषयी भीतीही व्यक्त केली आहे. करोनाचा कहर पाहून ही परीक्षा पुढे ढकलण्यात यावी, अशी मागणी स्वतंत्र म्युनिसिपल कामगार युनियनचे सरचिटणीस रवींद्र सूर्यवंशी यांनी पालिकेकडे केली आहे. त्यापाठोपाठ, भाजपनेही ही परीक्षा पुढे ढकलली जावी, अशी मागणी केली आहे. मुख्य लिपिक, वरिष्ठ लेखा परीक्षक व लेखा सहाय्यक या पदासाठी लेखी परीक्षा रद्द करून तीन महिन्यांनंतर घेण्याची मागणी भाजपचे पालिकेतील गटनेते प्रभाकर शिंदे यांनी पालिका आयुक्त इक्बालसिंह चहल यांच्याकडे पत्राद्वारे केली आहे. या परीक्षेसाठी बसणारे काही कर्मचारी करोनाबाधित झाले असून त्यांना विलगीकरणात ठेवले आहे. तेव्हा, ही परीक्षा तीन महिन्यांनंतर घेणे उचित ठरेल, असे शिंदे यांनी पत्रात म्हटले आहे. महापौर-आयुक्तांना पत्र म्युनिसिपल मजदूर युनियननेही ही परीक्षा पुढे ढकलण्यात यावी, असे पत्र महापौर किशोरी पेडणेकर यांच्यासह आयुक्त चहल यांच्याकडे पत्रातून केली आहे. ही परीक्षा पाच वर्षांनी होणार असल्याने सगळेच लिपिक हे धोका पत्करूनही परीक्षेस बसतील, अशीही भीती आहे. तेव्हा, करोनाची स्थिती पाहून ही परीक्षा पुढे ढकलणे योग्य ठरेल, असे संघटनेचे सहा. सरचिटणीस शैलेंद्र खानविलकर, अॅड. योगेश नाईक यांनी पत्रात नमूद केले आहे.

from Career News in Marathi: Career News, मराठी Career बातम्या | Maharashtra Times https://ift.tt/3tdqIaJ
via IFTTT