उच्च शिक्षण शिष्यवृत्ती अर्जासाठी मुदतवाढ देण्याची मागणी

म. टा. प्रतिनिधी, नाशिक विद्यार्थ्यांना तंत्रशिक्षण व योजनांसाठी महाडीबीटी पोर्टलवरून ऑनलाइन पद्धतीने अर्ज भरण्याठी मुदतवाढ देण्याची मागणी केअर ऑफ पब्लिक सेफ्टी (कॉप्स) या विद्यार्थी संघटनेमार्फत करण्यात आली आहे. तसेच ज्या महाविद्यालयांनी ही माहिती विद्यार्थ्यांपर्यंत पेहोचवलेली नाही त्यांच्यावर कारवाईची मागणी या संघटनेमार्फत करण्यात आली आहे. तंत्रशिक्षण संचालनालयामार्फत राबविण्यात येणाऱ्या राज्य शासनाच्या विविध विभागाच्या शिष्यवृत्ती योजनांची ऑनलाइन पद्धतीने अंमलबजावणीसाठी महाडीबीटी पोर्टल विकसित करण्यात आलेले आहे. यामध्ये तंत्र शिक्षण संचालनालयामार्फत राबविण्यात येणाऱ्या शिष्यवृत्ती योजनाचा समावेश आहे. या शिष्यवृत्तींसाठी अर्ज करण्यासाठी उच्च शिक्षण व तंत्र शिक्षण विभागामार्फत ३० मार्चपर्यंत मुदत देण्यात आली होती. विद्यार्थ्यांच्या विनंतीनुसार ती ३० एप्रिलपर्यंत वाढविण्यात आली असून, त्यानंतर मुदतवाढ देण्यात येणार नसल्याचे जाहीर करण्यात आले आहे. परंतु, ही मुदत १० मेपर्यंत वाढविण्याची मागणी कॉप्स विद्यार्थी संघटनेमार्फत करण्यात आली आहे. याबाबतचे निवेदन उच्च शिक्षण व तंत्र शिक्षण विभागाला देण्यात आले आहे. लाखो विद्यार्थ्यांनी शैक्षणिक वर्ष २०२०-२१ करिता पात्र असूनही अद्याप अर्ज केलेले नाहीत. अनेक महाविद्यालयांनी राज्य सरकारच्या विविध विभागाच्या शिष्यवृत्ती योजनाची माहिती विद्यार्थ्यांपर्यंत पोहचवलेली नाही. अनेक विद्यार्थ्यांना राज्य शासनाच्या विविध विभागाच्या शिष्यवृत्ती योजनांची माहिती व महाडीबीटी पोर्टलवरून ऑनलाइन पद्धतीने अर्ज कसा भरावा, हे देखील माहित नाही. मुदतवाढीची मागणी विद्यार्थ्यांना शिष्यवृत्ती योजनांसाठी महाडीबीटी पोर्टलवरून ऑनलाइन पद्धतीने अर्ज भरण्यास १० मेपर्यंत मुदतवाढ द्यावी व शिष्यवृत्ती योजनेची प्रभावीपणे अंमलबजावणी न करणाऱ्या महाविद्यालयांवर तात्काळ कारवाई करावी, अशी मागणी या संघटनेमार्फत करण्यात आली आहे.

from Career News in Marathi: Career News, मराठी Career बातम्या | Maharashtra Times https://ift.tt/3sZJGkq
via IFTTT