विद्यापीठ अनुदान आयोगाचे माजी अध्यक्ष डॉ. अरुण निगवेकर यांचे निधन

पुणे: विद्यापीठ अनुदान आयोगाचे माजी अध्यक्ष आणि सावित्रीबाई फुले पुणे विद्यापीठाचे माजी कुलगुरू डॉ. अरुण निगवेकर यांचे शुक्रवारी ब्रेन ट्युमरने निधन झाले. ते गेल्या काही काळापासून कर्करोगाशीही झुंज देत होते. शैक्षणिक क्षेत्रासाठी त्यांनी मोलाचे योगदान दिले होते. भारतातील उच्च शिक्षण प्रणालीचा गुणवत्तेच्या अनुषंगाने मापदंड ठरवण्याच्या प्रणालीचा पाया डॉ. निगवेकर यांनी रचला आहे. दरम्यान, डॉ. निगवेकर यांच्या पुण्यातील निवासस्थानी करोना स्थितीमुळे कोणीही गर्दी करू नये, असे आवाहन त्यांच्या कुटुंबीयांनी केले आहे. २००० ते २००५ या कालावधीत त्यांनी विद्यापीठ अनुदान आयोगाचे अध्यक्षपद भूषविले होते. तत्पूर्वी १९९८ ते २००० या कालावधीत त्यांनी पुणे विद्यापीठाच्या कुलगुरूपदाची धुरा सांभाळली होती. शैक्षणिक संस्थांच्या मूल्यांकनावर शिक्कामोर्तब करणाऱ्या नॅक (नॅशनल असेसमेंट अँड अक्रिडिटेशन काउन्सिल) संस्थेचे ते संस्थापक संचालक होते. शैक्षणिक क्षेत्रात विशेषत: उच्च शिक्षण क्षेत्रात तंत्रज्ञानाच्या वापराचा त्यांनी प्रसार केला. उच्च शिक्षण क्षेत्रातील गुणवत्तेवर त्यांनी विशेष भर दिला. याच कारणाने 'भारताचे मिसाइल मॅन', माजी राष्ट्रपती डॉ. ए.पी.जे. अब्दुल कलाम हे निगवेकर यांचा उल्लेख 'भारतातील शैक्षणिक गुणवत्तेचे पितामह' असा करत. आंतरराष्ट्रीय ख्याती शिक्षणाचं जागतिकीकरण व्हायला हवे असे मानणाऱ्या निगवेकर यांनी स्वत:देखील आंतरराष्ट्रीय पातळीवर शैक्षणिक कामगिरी केली आहे. १९८० च्या दशकात ब्रिटनमधील योर्क विद्यापीठात तसेच कॅनडातील वेस्टर्न ऑटारिओ विद्यापीठात त्यांनी व्हिजिटिंग प्रोफसर म्हणून काम केले आहे. यूनेस्कोच्या एशिअन नेटवर्क ऑफ फिजिकल एज्युकेशनचे ते उपाध्यक्ष आणि आजीव सदस्य होते. फिजिक्स एज्युकेशन जर्नलचे ते संस्थापक संपादक होते. हेही वाचा:

from Career News in Marathi: Career News, मराठी Career बातम्या | Maharashtra Times https://ift.tt/3gEL8Gt
via IFTTT