CBSE परीक्षा लांबणीवर पडणार का? निर्णयासाठी PM मोदींची आज बैठक

वाढत्या कोविड-१९ संक्रमणाच्या पार्श्वभूमीवर, केंद्रीय माध्यमिक शिक्षण मंडळ अर्थात बोर्डाच्या परीक्षा पुढे ढकलाव्यात अशी जोरदार मागणी सर्व स्तरातून होत आहे. परीक्षा अवघ्या २१ दिवसांवर आल्या आहेत. अशात या परीक्षांच्या बाबतीत निर्णय घेण्यासाठी पंतप्रधान नरेंद्र मोदी यांच्या उपस्थितीत आज बुधवारी दुपारी एक महत्त्वाची बैठक पार पडणार आहे. सीबीएसई बोर्डामार्फत देशभरातून सुमारे ३० लाखांहून अधिक विद्यार्थी या परीक्षा देणार आहेत. या बैठकीत पंतप्रधान नरेंद्र मोदी यांच्यासह शिक्षणमंत्री रमेश पोखरियाल आणि अन्य अधिकारी उपस्थित राहणार आहेत. दहावी आणि बारावीच्या सीबीएसई बोर्डाच्या परीक्षा नियोजित वेळापत्रकानुसार ४ मे पासून सुरू होणार आहेत. मात्र देशभर करोना संसर्गाची स्थिती दिवसेंदिवस बिकट होत चालली आहे. परिणामी या परीक्षा पुढे ढकलण्याची मागणी होत आहे. मध्य प्रदेशचे मुख्यमंत्री शिवराज सिंह चौहान तसेच दिल्लीचे मुख्यमंत्री अरविंद केजरीवाल यांनी सीबीएसई बोर्ड परीक्षा रद्द करण्याची मागणी केली आहे. महाराष्ट्र सरकारनेही सीबीएसई बोर्डाला पत्र लिहून परीक्षा लांबणीवर टाकण्याची विनंती केली होती. केंद्र सरकारवर दबाव कोविड-१९ विषाणू संक्रमणाची स्थिती बिकट होत निघाली आहे. मंगळवारी देशभरात सुमारे १ लाख ८५ हजार नवे करोना रुग्ण आढळले आहेत. एक हजारहून अधिक रुग्णांचा मृत्यू झाला आहे. अशा अवस्थेत बोर्डाच्या परीक्षांसाठी विद्यार्थ्यांना परीक्षा केंद्रांवर बोलावणे धोकादायक असू शकते. त्यामुळे विद्यार्थी-पालक मोठ्या संख्येने या परीक्षा पुढे ढकलण्याची मागणी करत आहेत.

from Career News in Marathi: Career News, मराठी Career बातम्या | Maharashtra Times https://ift.tt/3ac6FCh
via IFTTT