शिष्यवृत्तीची कागदपत्रे उपलब्ध करा; विद्यार्थ्यांची मागणी

म. टा. विशेष प्रतिनिधी, मुंबई करोनाच्या पार्श्वभूमीवर शिष्यवृत्ती अर्ज भरण्यासाठी मुदतवाढ दिली आहे. मात्र, अर्जासोबत जोडावी लागणारी आवश्यक शैक्षणिक कागदपत्रे मिळण्यास अडचणी येत असल्याने विद्यार्थी शिष्यवृत्तीच्या लाभापासून वंचित आहेत. त्यामुळे विद्यार्थ्यांना सर्व कागदपत्रे सहज उपलब्ध होतील यासाठी सरकारने आदेश द्यावेत, अशी मागणी विद्यार्थी संघटना करीत आहेत. उच्च व तंत्रशिक्षण संचालनालयामार्फत राबविण्यात येणाऱ्या राज्य सरकारच्या विविध विभागांच्या शिष्यवृत्ती योजनांसाठी 'महाडीबीटी पोर्टल' विकसित केले आहे. परंतु, अद्यापही लाखो विद्यार्थ्यांनी शैक्षणिक वर्ष २०२०-२१साठी पात्र असूनही अद्याप अर्ज केला नाही. तसेच अनेक महाविद्यालयांनी शिष्यवृत्ती योजनांची माहिती विद्यार्थ्यांपर्यंत पोहोचवलेली नाही. विद्यार्थ्यांना बऱ्याच शिष्यवृत्ती योजनांची माहिती व महाडीबीटी पोर्टलवरून ऑनलाइन पद्धतीने अर्ज कसा भरावा? हेसुद्धा माहीत नाही. महाडीबीटी पोर्टलवरून ऑनलाइन अर्ज करण्यासाठी विद्यार्थ्यांना ३१ मेपर्यंत मुदतवाढ देण्यात आलेली आहे. करोनाच्या पार्श्वभूमीवर अनेक विद्यार्थ्यांकडे उत्पन्नाचे प्रमाणपत्र व इतर आवश्यक शैक्षणिक कागदपत्रे नसल्यामुळे पात्र असूनही त्यांना शिष्यवृत्तीसाठी ऑनलाइन अर्ज करता आला नाही. त्यामुळे आवश्यक शैक्षणिक कागदपत्रे विद्यार्थ्यांना तत्काळ उपलब्ध करून देण्यासाठी सर्व जिल्हाधिकाऱ्यांनी संबंधित अधिकाऱ्यांना पत्र पाठवावे. तसेच उच्च व तंत्रशिक्षण विभागाने शिष्यवृत्ती योजनेची प्रभावी अंमलबजावणी न करणाऱ्या महाविद्यालयांवर तत्काळ कारवाई करावी, अशी मागणी कॉप्स विद्यार्थी संघटनेचे अध्यक्ष अमर एकाड यांनी केली आहे. शिष्यवृत्ती योजनेची प्रभावी अंमलबजावणी करण्याचे परिपत्रक सर्व महाविद्यालयांना पाठविण्याची मागणी केल्यानंतर उच्च शिक्षण व सर्व विभागीय सहसंचालकांनी परिपत्रक जारी केले आहे. शिष्यवृत्ती योजनांची प्रभावी अंमलबजावणी करण्यासाठी विद्यार्थ्यांना योग्य त्या सर्व सुविधा उपलब्ध करून देण्याबाबतची कार्यवाही तत्काळ करण्याचे आदेश दिले आहेत. एसएनडीटी महिला विद्यापीठ, महाराष्ट्र विधी विद्यापीठ मुंबई, डॉ. होमी भाभा स्टेट विद्यापीठाला कळविले आहे. मुळात विद्यार्थ्यांना कमीत कमी वेळात कागदपत्रे उपलब्ध करून देण्याबाबत विचार सरकारने विचार करण्याची गरज आहे. जेणेकरून एकही पात्र विद्यार्थी दाखल्याच्या अनुपलब्धतेमुळे शिष्यवृत्तीपासून वंचित राहणार नाही, याची दक्षता आता संबधित कार्यालयांनी घेतली पाहिजे, असे एकाड यांनी म्हटले आहे.

from Career News in Marathi: Career News, मराठी Career बातम्या | Maharashtra Times https://ift.tt/3w3H1Is
via IFTTT