नागपूर विद्यापीठाच्या हिवाळी परीक्षा मे महिन्यातच होण्याची शक्यता

म. टा. प्रतिनिधी, नागपूर करोनामुळे लांबलेल्या राष्ट्रसंत तुकडोजी महाराज नागपूर विद्यापीठाच्या मे महिन्यातच होणार असल्याचे संकेत आहेत. प्रथम आणि तृतीय वर्षाच्या विविध २१ अभ्यासक्रमांच्या परीक्षांसाठीचे वेळापत्रक लवकरच जाहीर होण्याची शक्यता आहे. व्यावसायिक अभ्यासक्रमांच्या परीक्षा याआधीच घेण्यात येणार होत्या. त्याकरिता वेळापत्रकही जाहीर करण्यात आले होते. मात्र, करोनाचा प्रकोप वाढल्याने त्या लांबणीवर टाकण्यात आल्या. स्थगित करण्यात आलेल्या परीक्षांमध्ये बीई, बीटेक, बीफार्म, तीन आणि पाच वर्षांचे एलएलबी यांचे प्रथम सत्र तर बीई, बीटेक, बीफार्म यांचे तृतीय सत्र यांचा समावेश होता. याशिवाय, इतर १२ परीक्षाही विद्यापीठाने स्थगित केल्या होत्या. करोनाबाधितांच्या संख्येत गेल्या आठ दिवसांत घट झाली आहे. त्यामुळे, परीक्षा घेण्याची तयारी विद्यापीठाने निश्चित केली आहे. मे महिन्यातच या हिवाळी परीक्षा उरकून घेण्याचा विद्यार्थ्याचा मानस आहे. या परीक्षेचे वेळापत्रक लवकरच जाहीर केले जाणार असल्याची माहिती आहे. दरम्यान, विद्यापीठाच्या यंदाच्या उन्हाळी परीक्षांचा प्रश्नही अजून सुटलेला नाही. येत्या १५ जूनपासून या परीक्षा सुरू होणार आहेत. सुरुवातीला प्रात्यक्षिक परीक्षा झाल्यानंतर २९ जूनपासून लेखी परीक्षा घेण्यात येणार आहेत. तीन वर्षांच्या अभ्यासक्रमातील सहावे सत्र, चार वर्षांच्या अभ्यासक्रमातील आठवे सत्र आणि दोन वर्षांच्या पदव्युत्तर अभ्यासक्रमातील चौथे सत्र यांच्या परीक्षा विद्यापीठ स्तरावर ऑनलाइन पद्धतीने घेण्यात येणार आहेत. इतर सत्रांच्या परीक्षांबाबतचा निर्णय विद्यापीठाने अद्याप जाहीर केलेला नाही.

from Career News in Marathi: Career News, मराठी Career बातम्या | Maharashtra Times https://ift.tt/3eR3in4
via IFTTT