म. टा. विशेष प्रतिनिधी, मुंबई इंजिनीअरिंग कॉलेजांना मान्यता देणे तसेच नवीन अभ्यासक्रमांना मान्यता देणे यासाठी अखिल भारतीय तंत्रशिक्षण परिषदेने यंदा ऑनलाइन प्रक्रियेचा वापर केला आहे. यामुळे या कॉलेजांना होणारी समितीची भेटही ऑनलाइन स्वरूपात होणार आहे. प्रत्येक इंजिनीअरिंग कॉलेजने आपल्या कॉलेजांतील सोयी-सुविधांची एक आभासी सफर विद्यार्थ्यांना घडावी, यासाठी वेबसाइटवर व्हिडीओ अपलोड करावा, अशी सूचना परिषदेने यापूर्वीच कॉलेजांना केली होती. मात्र यंदा नव्याने कॉलेज सुरू करणे तसेच मान्यतेची मुदत संपलेल्या कॉलेजांसाठी मुदतवाढ घेणे किंवा नवीन अभ्यासक्रमास मान्यता घेणे या सर्व प्रक्रिया ऑनलाइन स्वरूपात होणार असल्याचे परिषदेने स्पष्ट केले आहे. कॉलेजला किंवा कॉलेजमध्ये नवीन अभ्यासक्रमाला मान्यता देताना कॉलेजांना परिषदेकडे अर्ज करावा लागतो. यानंतर परिषदेकडून तज्ज्ञांचे पथक कॉलेजला भेट देते. यानंतर त्यांचा अहवाल प्राप्त झाल्यानंतर परिषद योग्य तो निर्णय घेते. मात्र करोनामुळे प्रत्यक्ष भेट देणे शक्य नाही. यामुळे ही प्रक्रिया पूर्णपणे ऑनलाइन करण्याचा निर्णय परिषदेने घेतला आहे. कॉलेजांनी डिजिटल स्वाक्षरीसह अर्ज परिषदेकडे सुपूर्द केल्यानंतर त्याची पुढील प्रक्रिया पार पडल्यानंतर भेटही ऑनलाइनच होणार आहे. यासाठी संस्थांना व्हिडीओ अपलोड करणे बंधनकारक असेल. याचबरोबरब लाइव्ह व्हिडीओही करावा लागणार आहे. त्याची सत्यता पडताळून पाहिल्यानंतर मान्यतेबाबतचा अंतिम निर्णय घेण्यात येईल, असे परिषदेतर्फे सांगण्यात आले. अर्जांची संख्या घटली शैक्षणिक वर्ष २०२०-२१ मध्ये १७१ नवीन संस्थांना मान्यता देण्यात आली होती. ही संख्या २०१९-२०च्या तुलनेत सुमारे १३८ टक्क्यांनी घटली होती. या शैक्षणिक वर्षात ९४५ संस्थांना मान्यता देण्यात आली होती. २०२०-२१ या शैक्षणिक वर्षापासून ५० टक्के जागा रिक्त असणाऱ्या शैक्षणिक संस्थांवर बंदी आणण्याचा निर्णय घेतला होता. यामुळे ही अर्ज संख्या कमी झाल्याचे तज्ज्ञांचे म्हणणे आहे.


from Career News in Marathi: Career News, मराठी Career बातम्या | Maharashtra Times https://ift.tt/3yfzlEO
via IFTTT