राज्यातील वैद्यकीय अभ्यासक्रमांच्या परीक्षा आणखी लांबणार?

म. टा. प्रतिनिधी, नाशिक महाराष्ट्र आरोग्य विज्ञान विद्यापीठामार्फत २ जूनपासून परीक्षांचे आयोजन करण्यात आले आहे. परंतु, 'कोव्हिड-१९'च्या पार्श्वभूमीवर राज्यातील कडक निर्बंध १ जूनपर्यंत वाढविले असल्याने, या परीक्षांबाबत चर्चा करून सरकारला फेरप्रस्ताव पाठविण्याचे निर्देश विद्यापीठाचे प्रति-कुलपती तथा वैद्यकीय शिक्षणमंत्री यांनी दिले आहेत. त्यामुळे विद्यापीठाच्या परीक्षा पुढे जाण्याची शक्यता आहे. महाराष्ट्र आरोग्य विज्ञान विद्यापीठाच्या विविध विद्याशाखांच्या हिवाळी-२०२० पदवी परीक्षा २ जूनपासून विद्यार्थ्यांच्या उपस्थितीत घेण्याबाबतचा निर्णय घेण्यात आला होता. महाराष्ट्रातील कोव्हिडविषयक सध्याची परिस्थिती पाहता राज्यातील कडक निर्बंधांमुळे परीक्षेच्या नियोजन संदर्भामध्ये तसेच वेळापत्रकासंदर्भात वैद्यकीय शिक्षणमंत्री अमित देशमुख यांच्या अध्यक्षतेखाली नुकतीच ऑनलाइन पद्धतीने आढावा बैठक आयोजित करण्यात आली होती. या बैठकीत सर्व संबंधितांनी चर्चा करून याबाबत निर्णय घ्यावा आणि तसा प्रस्ताव शासनास सादर करावा, असे निर्देश मंत्री देशमुख यांनी दिले. या बैठकीस वैद्यकीय शिक्षण व औषधी द्रव्ये विभागाचे सचिव विजय सौरभ, विद्यापीठाचे प्रभारी कुलगुरु डॉ. नितीन करमळकर, वैद्यकीय शिक्षण व संशोधन संचालनालाचे संचालक डॉ. तात्याराव लहाने, सहसंचालक डॉ. अजय चंदनवाले, कुलसचिव डॉ. कालिदास चव्हाण, परीक्षा नियंत्रक डॉ. अजित पाठक तसेच विद्यापीठाच्या विद्याशाखांचे अधिष्ठाता डॉ. सचिन मुंबरे, डॉ. जयंत पळसकर, डॉ. श्रीकांत देशमुख, डॉ. धनाजी बागल, डॉ. राजश्री नाईक उपस्थित होते. 'उन्हाळी'साठीही चर्चा पदव्युत्तर वैद्यकीय विद्यार्थ्यांच्या उन्हाळी-२०२१ परीक्षा २४ पासून नियोजित होत्या. या परीक्षा आधीच पुढे ढकलण्यात आल्या आहेत. या परीक्षेचे सुधारित वेळापत्रकही अद्याप जाहीर करण्यात आलेले नाही. त्यामुळे परीक्षांच्या वेळापत्रकाबाबत सर्व संबंधितांनी चर्चा करून निर्णय घ्यावा आणि तसा प्रस्ताव सरकारकडे मान्यतेस्तव सादर करावा असे आदेश देशमुख यांनी दिले आहेत.

from Career News in Marathi: Career News, मराठी Career बातम्या | Maharashtra Times https://ift.tt/33SfJbD
via IFTTT