'आरटीई' प्रवेश अधांतरीच; आवश्यक कागदपत्रांसाठी पालकांची धावपळ

म. टा. प्रतिनिधी, पुणे शिक्षण हक्क कायद्याअंतर्गत (आरटीई) मिळणाऱ्या प्रवेशांसाठी आवश्यक कागदपत्रांची पूर्तता करण्यासाठी पालकांना अनेक अडचणींचा सामना करावा लागत आहे. लॉकडाउननंतर आरटीई प्रवेशप्रक्रिया पूर्ण होणार असली, तरी उत्पन्नाचे दाखले, भाडे करार आणि जातीचे दाखले मिळवण्यासाठी अनेक पालकांना अडचणींचा सामना करावा लागत आहे. यामुळे लॉटरीमध्ये प्रवेश निश्चित झालेल्या विद्यार्थ्यांचे प्रवेशही अद्याप अधांतरीच आहेत. एप्रिल महिन्याच्या सुरुवातीला आरटीई प्रवेशांसाठी लॉटरी काढण्यात आली. त्यानंतर ज्या विद्यार्थ्यांना प्रवेश मिळाले आहेत, अशा विद्यार्थ्यांच्या पालकांना 'एसएमएस'द्वारे कळवण्यात आले आहे. मात्र, या पालकांपुढे आता कागदपत्रे मिळवण्याचे मोठे आव्हान उभे राहिले आहे. अनेक पालकांचे लॉकडाउनच्या काळात उत्पन्न कमी झाले आहे. त्यांच्याकडे पूर्वीच्या उत्पन्नाचे दाखले आहेत. यामुळे जुन्या दाखल्यांच्या आधारे अर्ज करावे लागले आहेत. नवे दाखले मिळवण्यासाठी अनेक प्रकारच्या अडचणी येत असल्याचे पालकांकडून सांगितले जात आहे. जातीचा दाखला मिळवण्यासाठी पालकांना सरकारी कार्यालयांच्या फेऱ्या माराव्या लागत असून, हे दाखलेही उपलब्ध होत नसल्याचे पालकांकडून सांगण्यात येत आहे. यंदा आरटीई प्रवेशांसाठी पालकांना भाडेकराराची प्रत देणे बंधनकारक करण्यात आले आहे. अनेक पालक वस्ती भागात राहत असल्याने त्यांच्या घरांचे भाडेकरार केलेले नाहीत, अशा पालकांनाही प्रवेशप्रक्रियेत अनेक अडचणी येणार आहेत. सरकारने यावर काहीतरी मार्ग काढावा, अशी मागणी पालक संघटनांतर्फे करण्यात आली आहे. 'कागदपत्रांची छाननी शाळेत करा' गेल्या वर्षी आरटीई प्रवेशासाठी आवश्यक असलेल्या कागदपत्रांची छाननी शिक्षणाधिकाऱ्यांच्या कार्यालयात झाली होती. या प्रक्रियेला मोठा कालावधी लागतो. या ऐवजी प्रशासनाने कागदपत्रांची छाननी संबंधित शाळांत घ्यावी, अशी मागणी पुणे पेरेंट्स युनायटेड या संघटनेतर्फे करण्यात आली आहे. करोनाकाळातही योग्य ती काळजी घेऊन पालकांना जवळच्या शाळांत बोलावल्यास गर्दी टाळता येईल आणि जलदगतीने कागदपत्रे छाननीची प्रक्रिया पूर्ण होईल, असे संस्थेतर्फे सांगण्यात आले आहे. आरटीई प्रवेशप्रक्रियेसाठी लागणारी कागदपत्रे मिळण्यास अडथळे येत आहेत. अनेकांना जुन्या कागदपत्रांच्या आधारे अर्ज करावे लागले आहेत. प्रशासनाने ही बाब लक्षात घेऊन योग्य ती कार्यवाही करणे अपेक्षित आहे. प्रवेशांची पहिली फेरी जलदगतीने झाली, तर प्रतीक्षायादीत असलेल्या विद्यार्थ्यांच्या प्रवेशांसंदर्भातही स्पष्टता येईल. - मुकुंद किर्दत, समन्वयक, पुणे पेरेंट्स युनायटेड

from Career News in Marathi: Career News, मराठी Career बातम्या | Maharashtra Times https://ift.tt/3fwQKjO
via IFTTT