नागपूर विद्यापीठाच्या हिवाळी परीक्षा पुन्हा लांबणीवर

म. टा. प्रतिनिधी, नागपूर राष्ट्रसंत तुकडोजी महाराज नागपूर विद्यापीठाच्यावतीने घेण्यात येणाऱ्या हिवाळी २०२० या परीक्षा पुढे ढकलण्यात आल्या आहेत. करोनाची स्थिती अद्याप सुरळीत न झाल्याने सध्या परीक्षा न घेण्याचा निर्णय विद्यापीठाने घेतला आहे. पुढे ढकलण्यात आलेल्या परीक्षांमध्ये बीसीए, बीएस्सी, बीआर्क, बीबीए, बीकॉसटेक, बीसीसीए, बीए, बीएसडब्ल्यू, बीएएलएलबी, बीई, बीटेक, बीफार्म, बीएचएमसीटी तसेच तीन आणि पाच वर्षांचे एलएलबी यांच्या प्रथम सत्र परीक्षांचा समावेश आहे. याशिवाय, बीई, बीटेक आणि बीफार्मच्या तृतीय वर्षाच्या परीक्षाही पुढे ढकलण्यात आल्या आहेत. या लेखी परीक्षांची तारीख लवकरच जाहीर केली जाणार आहे. हिवाळी २०२०च्या ऑनलाइन परीक्षांमध्ये काही विद्यार्थी तांत्रिक कारणांमुळे परीक्षा देऊ शकले नव्हते. अशा विद्यार्थ्यांची पुन्हा परीक्षा घेण्यात येईल. तसेच त्याचेही वेळापत्रक घोषित केले जाईल, असे नागपूर विद्यापीठाच्या परीक्षा आणि मूल्यमापन मंडळाचे संचालक डॉ. प्रफुल्ल साबळे यांनी सांगितले. करोनामुळे व्यावसायिक अभ्यासक्रमांच्या प्रवेशांना उशीर झाला होता. उशिरा प्रवेश झालेल्या विद्यार्थ्यांचा अभ्यासक्रम पूर्ण होत नसल्याचे लक्षात आल्याने या परीक्षा उशिरा घेण्याचा निर्णय घेण्यात आला होता. करोनाच्या दुसऱ्या लाटेने तीव्र स्वरूप घेतल्यानंतर हिवाळी २०२० परीक्षा पुढे ढकलण्यात आल्या होत्या. करोनाबाधितांची संख्या काही प्रमाणात कमी होत असल्याने परीक्षा आता मे महिन्यातच घेतल्या जातील, असा अंदाज व्यक्त करण्यात येत होता. मात्र, शहरातील स्थिती काही प्रमाणात सुधारली असली तरीही ग्रामीण भागात मात्र आता रुग्णसंख्या वाढू लागली आहे. या पार्श्वभूमीवर नागपूर विद्यापीठाने हिवाळी २०२०ची परीक्षा पुन्हा पुढे ढकलली आहे. परीक्षा अर्जांची मुदत वाढवा : प्राचार्य फोरम नागपूर विद्यापीठाच्यावतीने जून महिन्यात उन्हाळी परीक्षा होणार आहेत. या परीक्षांचे अर्ज स्वीकारण्यासाठी विद्यापीठाने २९ मेपर्यंत मुदत दिली होती. मात्र, महाराष्ट्र सरकारने १ जूनपर्यंत राज्यात कडक निर्बंध लावले आहेत. कॉलेजांमध्ये शिक्षकेतर कर्मचाऱ्यांची उपस्थितीही कमी आहे. त्यामुळे, विद्यार्थ्यांकडून या मुदतीत परीक्षा अर्ज स्वीकारणे आणि विद्यापीठात जमा करणे शक्य होणार नाही. त्यामुळे, अर्ज स्वीकारण्याची मुदत वाढवून दिली जावी, अशी मागणी प्राचार्य फोरमने केली आहे.

from Career News in Marathi: Career News, मराठी Career बातम्या | Maharashtra Times https://ift.tt/3tYbKVR
via IFTTT