सोप्या MCQ पेपरमध्येही विद्यार्थी करताहेत कॉपी! विद्यापीठ हैराण

म. टा. प्रतिनिधी, पुणे सावित्रीबाई फुले पुणे विद्यापीठाच्या ऑनलाइन सत्र परीक्षा बहुपर्यायी (एमसीक्यू) स्वरुपात सोप्या पद्धतीने होत असताना, साधारण ३५० विद्यार्थी गैरप्रकार करताना सापडले आहे. नेहमीच्या सत्र परीक्षांच्या तुलनेत सध्याच्या ऑनलाइन परीक्षांची काठिण्यपातळी कमी असतानाही विद्यार्थी गैरप्रकार करीत असल्याने विद्यार्थ्यांच्या शैक्षणिक गुणवत्तेबाबत प्रश्न उपस्थित करण्यात येत आहे. करोनाच्या पार्श्वभूमीवर पुणे विद्यापीठाच्या सत्र परीक्षांना १० एप्रिलपासून ऑनलाइन प्रॉक्टर्ड पद्धतीने सुरुवात झाली. विद्यापीठाच्या २२४ अभ्यासक्रमांसाठी परीक्षा होत असून, साधारण सहा लाख विद्यार्थी परीक्षा देत आहेत. विद्यार्थ्यांना घरबसल्या मोबाईल, लॅपटॉप, कम्प्युटर अशा कोणत्याही साधनांचा वापर करुन देता येत आहे. मात्र, याचाच गैरफायदा विद्यार्थी घेत असल्याचे आढळून आले आहेत. या परीक्षेत एका विषयाचा पेपर हा केवळ ५० गुणांचा असून, विद्यार्थ्यांना एका तासात सोडवायचा आहे. परीक्षा प्रक्रिया एवढी सोपी असतांनाही गैरप्रकार होत आहेत. गैरप्रकार करणाऱ्या विद्यार्थ्यांमध्ये सर्वाधिक विद्यार्थी इंजिनीअरिंग शाखेचे आहे. त्यानंतर बीएस्सी कम्प्युटर अभ्यासक्रमाचे विद्यार्थीही गैरप्रकार करताना आढळून आले आहे. आतापर्यत साधारण ९० टक्के अभ्यासक्रमांच्या परीक्षा पार पडल्या असून, त्यामध्ये विद्यार्थ्यांच्या उपस्थितीचे प्रमाण ९५ टक्क्यांपेक्षा अधिक आहे. सामान्यतः ऑफलाइन लेखी परीक्षांमध्ये हे प्रमाण ८२ ते ८४ टक्क्यांच्या दरम्यान असते. त्यामुळे ऑनलाइन परीक्षेला विद्यार्थ्यांनी उत्तम प्रतिसाद दिला असून, उपस्थितांचे प्रमाण १० टक्क्यांनी वाढले आहे, अशी माहिती परीक्षा व मूल्यमापन मंडळाने दिली आहे. गैरप्रकारांसाठी स्क्रीनशॉटचा वापर ऑनलाइन परीक्षांमध्ये विद्यार्थ्यांनी गैरप्रकार करू नये, यासाठी प्रॉक्टर्ड पद्धतीचा वापर करण्यात येत आहे. गेल्यावर्षी प्रमाणे यंदा देखील ऑनलाइन परीक्षेत इतर साधनांचा वापर; तसेच गुगल सर्च करुन परीक्षा देता येईल, असे काही विद्यार्थ्यांना वाटले. मात्र, प्रॉक्टर्ड पद्धतीने ऑनलाइन परीक्षेत 'स्क्रीनशॉट' काढून परीक्षा देणाऱ्या ३५० पेक्षा अधिक विद्यार्थ्यांची माहिती परीक्षा व मूल्यमापन मंडळाला मिळाली आहे. या विद्यार्थ्यांचे पीआरएन क्रमांक, वेळ, कोणते प्रश्न होते अशा सर्वांची माहिती विद्यापीठाने जमा केली आहे. या विद्यार्थ्यांवर आता कॉपी प्रकरणानुसार कारवाई होण्याची शक्यता वर्तविण्यात आली आहे.

from Career News in Marathi: Career News, मराठी Career बातम्या | Maharashtra Times https://ift.tt/3o21v1r
via IFTTT