SSC Result 2021: १२ हजारांवर शाळांकडून विद्यार्थ्यांचे मूल्यमापन

म. टा. विशेष प्रतिनिधी, मुंबई ऑनलाइन वर्गांमध्ये विद्यार्थ्यांचे अंतर्गत मूल्यमापन झाले की नाही, याबाबत विविध चर्चा सुरू असतानाच राज्यातील १२ हजार ९३१ शाळांनी दहावीच्या विद्यार्थ्यांचे विविध मार्गांनी अंतर्गत मूल्यमापन केले आहे. यामध्ये सिंधुदुर्ग जिल्हा आघाडीवर असल्याचे समोर आले आहे. करोनाचा प्रादुर्भाव लक्षात घेता मागील जूनपासून ऑनलाइन शिक्षण सुरू झाले. शिक्षण विभागाने हे शिक्षण नेमके कसे चालते, यामध्ये काही त्रुटी आहेत का, विद्यार्थ्यांचे मूल्यमापन होते का हे पाहण्यासाठी याबाबतचा साप्ताहिक अहवाल शाळांकडून मागविला होता. राज्यातील २५ हजार ९२७ शाळांपैकी १२ हजार ९३१ शाळांनी दिलेल्या माहितीमध्ये दहावीच्या विद्यार्थ्यांचे विविध स्तरावर ऑनलाइन मूल्यांकन झाल्याचे समोर आले आहे. याचा फायदा दहावीचा निकाल जाहीर करण्यासाठी निकष ठरविताना होऊ शकेल, असा विश्वास व्यक्त करण्यात येत आहे. शिक्षण विभागाकडून प्राप्त झालेल्या माहितीनुसार या शाळांमध्ये ऑनलाइन, व्हॉट्सअॅप, ऑनलाइन तोंडी परीक्षा, ऑफलाइन परीक्षा, घरी पेपर सोडविण्यास देणे, कार्यपुस्तिका देणे आणि इतर अशा विविध पर्यायांचा वापर करून विद्यार्थ्यांचे मूल्यांकन करण्यात आले आहे. दहावीच्या विद्यार्थ्यांसाठी शाळांमध्ये नेहमीपेक्षा अतिरिक्त मूल्यमापन केले जाते. हे मूल्यमापन शाळा त्यांच्या स्तरावर करत असतात. सध्या शालेय शिक्षण विभाग दहावीचा निकाल कोणत्या निकषांवर जाहीर करावा, याबाबत विचार करत आहे. यासाठी ऑनलाइन सर्वेक्षणही हाती घेण्यात आले आहे. यामध्ये बहुतांश शाळा अंतर्गत मूल्यमापनासाठी तयार आहेत. तर काही शाळांनी यापूर्वीच हे मूल्यमापन केल्याचे समोर येत आहे. ऑनलाइन सर्वेक्षणाच्या शेवटच्या दिवशी २१ हजार ११० शाळांनी प्रतिसाद नोंदविला असून यापैकी ८२.८४ टक्के म्हणजे १७ हजार ४८७ शाळा अंतर्गत मूल्यमापनासाठी तयार असल्याचे समोर आले आहे. याचबरोबर काही शाळांनी अंतर्गत मूल्यमापानाच्या आधारे विद्यार्थ्यांचे निकालही तयार करून ठेवले आहेत. यामुळे इतर शाळांशी चर्चा करून जर त्यांनीही अशा प्रकारे अंतर्गत मूल्यमापन प्रक्रिया पार पाडली असेल तर दहावी उत्तीर्ण करण्यासाठीचे निकष ठरविताना त्याचा फायदा होऊ शकणार आहे. याचबरोबर ज्या शाळांनी हे मूल्यांकन केले नसेल त्यांच्यासाठी काय पर्याय असावा याबाबतही विचार होऊ शकतो, असेही तज्ज्ञांचे म्हणणे आहे.

from Career News in Marathi: Career News, मराठी Career बातम्या | Maharashtra Times https://ift.tt/3fcvOhN
via IFTTT