परदेशी जाणाऱ्या विद्यार्थ्यांना दुसरी मात्रा २८ दिवसांनंतर

म. टा. विशेष प्रतिनिधी, मुंबई परदेशी जाणाऱ्या विद्यार्थ्यांना करोना प्रतिबंधक लशीची दुसरी मात्रा २८ दिवसांनंतर देण्यात यावी, अशी सूचना केंद्र सरकारने केली आहे. याबाबतची कार्यपद्धतीही जाहीर करण्यात आली असून यामध्ये लशीचे प्रमाणपत्र पासपोर्टशी लिंक केले जाणार असल्याचेही म्हटले आहे. या निर्णयामुळे हजारो विद्यार्थ्यांना दिलासा मिळणार आहे. याबाबत 'मटा'ने वृत्तमालिका केली होती. परदेशात शिकण्यासाठी जाणाऱ्या विद्यार्थ्यांना लशीची दुसरी मात्रा मिळत नसल्याने प्रवास करताना त्यांना अडचणी येत होत्या. याबाबत मुंबई ग्राहक पंचायतीने सर्वप्रथम पत्र लिहून या विद्यार्थ्यांना लसीकरणात प्राधान्य द्यावे, अशी मागणी केली होती. यानुसार पालिकेने निर्णयही घेतला. मात्र दुसरी मात्रा विद्यार्थ्यांना ८४ दिवसांनंतर घ्यायची झाल्यास अनेकांची परदेशात पोहोचण्याची तारीख उलटून जात होती. यामुळे या विद्यार्थ्यांसाठी ८४ दिवसांची अट शिथिल करावी, अशी मागणीही करण्यात आली होती. यावर 'मटा'ने वृत्तमालिकेतून प्रकाश टाकला होता. यानंतर काही खासदार, मुंबई महानगरपालिका प्रशासनाने याबाबत केंद्र सरकारला पत्र पाठवून या विद्यार्थ्यांसाठी ८४ दिवसाची अट शिथिल करावी, अशी मागणी केली होती. या सर्वांची दखल घेत केंद्रीय आरोग्य मंत्रालयाने परदेशी शिकण्यासाठी तसेच नोकरीसाठी जाणाऱ्यांना दुसऱ्या मात्रेसाठी २८ दिवसांनंतर पात्र ठरविले आहे. यामध्ये टोकियो येथे ऑलिम्पिकसाठी जाणारे स्पर्धक, खेळाडू यांचाही समावेश करण्यात आला आहे. दुसरी मात्रा देताना कागदपत्रांची योग्य तपासणी करून योग्य उमेदवारांना ही लस देण्यात यावी, असेही यामध्ये सांगण्यात आले आहे. परदेशात जाणाऱ्या विद्यार्थ्यांकडे प्रवेशाचे पत्र असणे आवश्यक आहे. जे यापूर्वीच परदेशात शिक्षण घेत होते आणि त्यांना आता पुन्हा परदेशात जायचे आहे अशा विद्यार्थ्यांचे तेथील ओळखपत्र, नोकरीला जाणाऱ्या उमेदवारांचे नियुक्तीपत्र तपासून दुसरी मात्रा दिली जाणार आहे. योजना ३१ ऑगस्टपर्यंत दुसरी मात्रा घेताना विद्यार्थ्यांना पासपोर्ट क्रमांक देणे बंधनकारक असणार आहे. या लशीचे प्रमाणपत्र थेट पासपोर्टशी लिंक करण्यात येणार असल्याचेही केंद्रीय आरोग्य मंत्रालयाने प्रसिद्ध केलेल्या मार्गदर्शक सूचनांमध्ये स्पष्ट करण्यात आले आहे. या सर्वांना कोव्हिशील्ड लस देण्यात येणार आहे. ही योजना ३१ ऑगस्टपर्यंत लागू राहणार असून यासाठी स्थानिक प्रशासनाने योग्य ती सुविधा उपलब्ध करावी, अशी सूचनाही करण्यात आली आहे.

from Career News in Marathi: Career News, मराठी Career बातम्या | Maharashtra Times https://ift.tt/3pAyBpL
via IFTTT