मुंबई विद्यापीठांतर्गत २४ नवे कॉलेज; १६ महामुंबईत

म. टा. विशेष प्रतिनिधी मुंबई : शैक्षणिक वर्ष २०२१-२२मध्ये मुंबई विद्यापीठाच्या अंतर्गत २४ नवीन कॉलेजे () सुरू होणार आहेत. यातील पाच कॉलेजे मुंबई शहरात असतील. तर ११ कॉलेजे ही ठाणे, नवी मुंबई आणि पालघर परिसरातील आहेत. यामुळे मुंबई महानगर क्षेत्राला यंदा १६ मिळणार आहेत. नवीन शैक्षणिक वर्षात कॉलेजांमध्ये विविध नवे अभ्यासक्रम सुरू करणे तसेच काही भागांत आवश्यकतेनुसार नवीन कॉलेजे सुरू करण्यासाठी विद्यापीठ बिंदूनामावली जाहीर करते. यानंतर त्या भागात कॉलेज सुरू करणाऱ्या संस्था अर्ज करतात. त्या विद्यापीठाच्या सर्व पात्रता निकषांमध्ये बसत असतील तर त्यांना राज्य सरकारमार्फत मान्यता देण्यात येते. राज्य सरकारने राज्यभरात शैक्षणिक वर्ष २०१९-२०पासून १११ नवीन कॉलेजांना परवानगी दिली होती. यात मुंबई विद्यापीठात एकूण २२ कॉलेजांना मान्यता देण्यात आली होती. यानंतर मुंबई विद्यापीठाने शैक्षणिक वर्ष २०२१-२२साठी ५४ नवीन ठिकाणी कॉलेजे सुरू करण्याची बिंदूनामावली जाहीर केली होती. यापैकी २४ कॉलेजांना मान्यता देण्यात आली आहे. यामध्ये सर्वाधिक कॉलेजे ही मुंबई उपनगर व ठाणे जिल्ह्यात असतील. ही नवी कॉलेजे सुरू झाल्यानंतर मुंबई विद्यापीठा अंतर्गत असलेल्या कॉलेजांची संख्या ८५० इतकी होणार आहे. मुंबईत सुरू होणाऱ्या कॉलेजांमध्ये चार रात्र कॉलेज आहेत तर एक विधी कॉलेज असणार आहे. कांदिवलीमध्ये विधी कॉलेज सुरू करण्यास मान्यता देण्यात आली आहे. याचबरोबर घाटकोपर, कुर्ला, बोरिवनी आणि गोवंडी या परिसरात रात्र कॉलेज सुरू करण्यात येणार आहे. ठाणे जिल्ह्यात शहापूर येथे आणि कल्याण येथील बिर्ला कॉलेज येथे नव्याने विधी कॉलेज सुरू करण्यात येणार आहे. यंदा राज्य सरकारला राज्यभरातून १९० शिक्षणसंस्थांनी नवीन कॉलेज सुरू करण्यासाठी इरादापत्र दिले होते. यापैकी १६६ कॉलेजांना परवानगी देण्यात आली आहे. याबाबत राज्य सरकारने शासन निर्णय प्रसिद्ध केला आहे. यातील काही शैक्षणिक संस्थांचे शाळा व ज्युनिअर कॉलेज सध्या सुरू आहेत. यामुळे पायाभूत सुविधांच्या बाबतीत या कॉलेजांना कोणतीही अडचण असणार नाही. यंदा ही सर्व प्रक्रिया ऑनलाइन पार पडली आहे. यामुळे विद्यापीठाकडून प्रत्यक्ष पाहणी झाल्यानंतर प्रत्यक्ष अभ्यासक्रम सुरू होणार आहेत, असे सूत्रांनी सांगितले. विद्यापीठाने ५४ ठिकाणांहून कॉलेज सुरू करण्याचे प्रस्ताव मागविले होते. मात्र करोनामुळे शिक्षणसंस्थांची आर्थिक घडी विस्कटली आहे. यामुळे बहुतांश शिक्षणसंस्थांनी नवीन कॉलेज सुरू करण्याकडे पुरेसे लक्ष दिले नाही. यामुळे यंदा इरादापत्रही कमी आल्याचे सूत्रांनी सांगितले. 'एसएनडीटी'च्या कॉलेजांनाही मान्यता एसएनडीटी महिला विद्यापीठाच्या कॉलेजांनाही राज्य सरकारने मान्यता दिली आहे. राज्यभरात या विद्यापीठाकडून विविध अभ्यासक्रमांसाठी २८ कॉलेजांना मान्यता देण्यात आली आहे. कोणत्या ठिकाणी कुठल्या प्रकारचे कॉलेज? कांदिवली : विधी कॉलेज घाटकोपर : रात्र कॉलेज कुर्ला : रात्र कॉलेज बोरिवली : रात्र कॉलेज गोवंडी : रात्र कॉलेज शहापूर : विधी कॉलेज कल्याण : विधी कॉलेज

from Career News in Marathi: Career News, मराठी Career बातम्या | Maharashtra Times https://ift.tt/3w8yuV1
via IFTTT