MHT-CET च्या नोंदणीस सुरुवात; प्रक्रियेस एक महिन्याची मुदत

म. टा. विशेष प्रतिनिधी, मुंबई बारावीची परीक्षा रद्द केल्यानंतर राज्य सामायिक प्रवेश परीक्षा कक्षाने इंजिनीअरिंग, औषधनिर्माणशास्त्र आणि कृषी या शाखांच्या प्रवेशासाठी होणाऱ्या एमएचटी-सीईटीच्या नोंदणीस सुरुवात केली आहे. ही नोंदणी मंगळवारी मध्यरात्रीपासून सुरू करण्यात झाली. करोनाच्या प्रादुर्भावामुळे यंदा बारावीच्या परीक्षेबाबत साशंकता निर्माण झाली होती. ही बाब लक्षात घेता सेलकडून व्यावसायिक अभ्यासक्रमाच्या प्रवेशासाठीची नोंदणीही थांबवली होती. बारावीचा निर्णय होईपर्यंत नोंदणीला सुरुवात केली नव्हती. बारावीच्या परीक्षा रद्द करत विद्यार्थ्यांच्या अंतर्गत मूल्यांकनावर निकाल जाहीर करण्याचा निर्णय शिक्षण विभागाने जाहीर केल्यानंतर प्रवेश परीक्षा कक्षाने व्यावसायिक अभ्यासक्रमाच्या प्रवेश परीक्षेची तयारी सुरू केली आहे. त्यानुसार इंजिनीअरिंग, औषधनिर्माणशास्त्र आणि कृषी या अभ्यासक्रमासाठी महत्त्वाच्या असलेल्या एमएचटी सीईटीच्या प्रवेश परीक्षेसाठी ८ जूनच्या मध्यरात्रीपासून नोंदणी प्रक्रियेस सुरूवात करण्यात आली आहे. या प्रक्रियेस १ महिन्याची मुदत आहे. त्यानंतर विद्यार्थ्यांचा प्रतिसाद पाहून मुदतवाढ देण्यात येणार आहे. तसेच, परीक्षेसंदर्भातील निर्णय घेण्यात येणार आहे. एमएचटी सीईटीच्या प्रवेश प्रक्रियेच्या नोंदणीनंतर ८ ते १० दिवसांनी अन्य व्यावसायिक अभ्यासक्रमांच्या म्हणजेच एमबीए, एमसीए, विधी, बीएड, बीए-बीएड, एमए-एमएड, फाइन आर्ट या व्यावसायिक अभ्यासक्रमांच्या प्रवेश प्रक्रियेच्या नोंदणीला सुरुवात होईल, अशी माहिती कक्षाचे आयुक्त चिंतामणी जोशी यांनी दिली. नोंदणीसाठी कक्षाच्या www.mahacet.org या वेबसाइटवर लिंक उपलब्ध करण्यात आली आहे.

from Career News in Marathi: Career News, मराठी Career बातम्या | Maharashtra Times https://ift.tt/3pzRhWy
via IFTTT