Qs World Ranking 2021: जागतिक क्रमवारीत पुणे विद्यापीठाचे स्थान उंचावले

म. टा. प्रतिनिधी, पुणे जागतिक स्तरावरील क्वाकरेली सायमंड्स (क्यूएस) क्रमवारीत () सावित्रीबाई फुले पुणे विद्यापीठाची कामगिरी सुधारली असून, विद्यापीठाने ५९१ ते ६०० या गटात स्थान पटकावले आहे. जगातील पहिल्या दोनशे उच्च शिक्षण संस्थांत राज्यातील आयआयटी मुंबईने स्थान प्राप्त केले आहे. मुंबई विद्यापीठाला १००१ ते १२०० या गटात स्थान मिळाले आहे. 'क्यूएस' ही खासगी ब्रिटिश संस्था विद्यापीठांची क्रमवारी जाहीर करते. विद्यार्थी शिक्षक गुणोत्तर, परदेशी विद्याथ्र्यांची संख्या, संशोधन, गुणवत्ता, नोकरीच्या संधी अशा विविध निकषांच्या आधारे ही क्रमवारी जाहीर करण्यात येते. त्यानुसार २०२२ साठीची क्रमवारी बुधवारी जाहीर करण्यात आली. जागतिक क्रमवारीतील पहिल्या तीन क्रमांकांवर अनुक्रमे मॅसेच्युसेट्स इन्स्टिट्यूट ऑफ टेक्नॉलॉजी (एमआयटी), ऑक्सफर्ड विद्यापीठ आणि हॉर्वर्ड विद्यापीठ आहेत. देशातील साधारण ३५ उच्च शिक्षण संस्थांनी या क्रमवारीत स्थान मिळवले आहे. त्यात प्रामुख्याने 'आयआयटी'सारख्या केंद्रीय संस्थांचा वरचष्मा असल्याचे दिसून येत आहे. पुणे विद्यापीठाने गेल्या वर्षी जाहीर झालेल्या क्रमवारीत ६५१ ते ७०० या क्रमवारीत स्थान पटकावले होते. यंदा विद्यापीठ ५९१ ते ६०० या क्रमवारीच्या गटात आले आहे. जगभरातील पहिल्या दोनशे उच्च शिक्षण संस्थांमध्ये आयआयटी मुंबई १७७ व्या, आयआयटी दिल्लीने १८५ व्या, बेंगळुरूच्या इंडियन इन्स्टिट्यूट ऑफ सायन्स १८६ व्या स्थानी आहे. आयआयटी मद्रास २५५ व्या, आयआयटी कानपूर २७७ व्या, आयआयटी खरगपूर २८० व्या, आयआयटी गुवाहाटी ३९६ व्या, आयआयटी रुरकी ४०० व्या स्थानी आहे, असे क्यूएस रँकिंगच्या क्रमवारीतून स्पष्ट होते. जगभरातील १३०० शिक्षण संस्थांनी यामध्ये सहभाग नोंदवला असून, यामध्ये भारतातील ३५ शिक्षणसंस्थांची निवड झाली आहे. आयआयटी संस्थांचाही यात समावेश आहे. राज्यातील तीनच विद्यापीठांचा समावेश पारंपरिक विद्यापीठांमध्ये दिल्ली विद्यापीठ ५०१ ते ५१०, जवाहरलाल नेहरू विद्यापीठ ५६१ ते ५७०, सावित्रीबाई फुले पुणे विद्यापीठ ५९१ ते ६००, जादवपूर विद्यापीठ आणि हैद्राबाद विद्यापीठ ६५१ ते ७०० या गटात आहेत. त्याचप्रमाणे मुंबई विद्यापीठ १००१ ते १२०० या गटात स्थान मिळाले आहे. राज्यातील आयआयटी मुंबई, सावित्रीबाई फुले पुणे विद्यापीठ आणि मुंबई विद्यापीठ या तीनच शैक्षणिक संस्थांना क्रमवारीत स्थान मिळाले आहे. विद्यापीठ २०२० मध्ये ८०० च्या क्रमवारीत होते. मागील दोन वर्षांत आपले स्थान २०० क्रमांकाने उंचावले आहे. एक प्रतिष्ठित विद्यापीठ म्हणून नावारूपाला येण्याचा बहुमान विद्यापीठाने मिळवला आहे. या रँकिंगमुळे 'इन्स्टिट्यूशन ऑफ एमिनन्स'साठीचा आपला दावा प्रबळ झाला आहे. - डॉ. प्रफुल्ल पवार, कुलसचिव, सावित्रीबाई फुले पुणे विद्यापीठ यंदा आपण १०० क्रमाकांने वर पोहोचलो आहोत. आताच्या नव्या शैक्षणिक धोरणात आपण अनेक गोष्टींची पुनर्बांधणी केली आहे. 'मल्टी डिसिप्लिनरी रिसर्च'च्या निकषात आपण सहभागी झालो, तर अधिक वरच्या क्रमवारीत आपण येऊ शकतो. विद्यापीठातील ज्या सहकाऱ्यांनी यामध्ये योगदान दिले आहे, त्या सर्वांचे अभिनंदन! - डॉ. नितीन करमळकर, कुलगुरू, सावित्रीबाई फुले पुणे विद्यापीठ

from Career News in Marathi: Career News, मराठी Career बातम्या | Maharashtra Times https://ift.tt/3zk728S
via IFTTT