ITI Admiaaions 2021: आयटीआय प्रवेशांना अल्प प्रतिसाद

म. टा. प्रतिनिधी, पुणे करोनाच्या प्रादुर्भावामुळे औद्योगिक प्रशिक्षण संस्थेत () प्रवेश घेण्यासाठी सुरू असणाऱ्या प्रवेश प्रक्रियेला विद्यार्थ्यांकडून अल्प प्रतिसाद मिळत आहे. आतापर्यंत सुमारे एक लाख १८ विद्यार्थ्यांनी ऑनलाइन पद्धतीने नोंदणी केली आहे. गेल्या वर्षीच्या तुलनेत ही नोंदणी निम्म्यापेक्षाही कमी असल्याचे आकडेवारीतून दिसत आहे. या अल्प प्रतिसादामुळे 'आयटीआय'च्या जागा मोठ्या प्रमाणात रिक्त राहण्याची शक्यता वर्तविण्यात येत आहे. व्यावसायिक प्रशिक्षण आणि शिक्षण संचालनालयाकडून (डीव्हीईटी) राज्यातील सरकारी आणि खासगी आयटीआयमध्ये २०२१-२२ या शैक्षणिक वर्षात प्रवेश घेण्यासाठी १५ जुलैपासून ऑनलाइन पद्धतीने प्रवेश प्रक्रिया राबविण्यात येत आहे. यंदा दहावीचा निकाल अंतर्गत मूल्यांकनाच्या आधारे ९९.०५ टक्के एवढा जाहीर झाला. या निकालात १५ लाख ७४ हजार ९९४ विद्यार्थी उत्तीर्ण झाल्यामुळे आयटीआयला प्रवेश घेणाऱ्यांची संख्या वाढणार असल्याची शक्यता वर्तविण्यात आली होती. गेल्या वर्षी आयटीआयसाठी तीन लाख ३२ हजार २१८ विद्यार्थ्यांनी नोंदणी केली होती. मात्र, यंदा प्रवेश प्रक्रिया सुरू होऊन २० दिवस उलटून गेल्यानंतरही एक लाख १७ हजार ३०६ विद्यार्थ्यांनी नोंदणी केली आहे. 'डीव्हीईटी'कडून अर्ज नोंदणी करण्याची अंतिम तारीख अद्याप जाहीर करण्यात आलेली नाही. त्यामुळे साधारण ऑगस्टअखेरपर्यत अर्ज नोंदणी करण्याची प्रक्रिया सुरू राहण्याची शक्यता आहे. संचालनालयाच्या https://ift.tt/2BH1dcn या वेबसाइटवर प्रवेशप्रक्रिया सुरू झाली. प्रवेशासाठी ९१ प्रकारचे व्यवसाय अभ्यासक्रम उपलब्ध असून, ८० अभ्यासक्रमांसाठी दहावी उत्तीर्ण; तर ११ अभ्यासक्रमांसाठी दहावी उत्तीर्ण किंवा अनुत्तीर्ण उमेदवार पात्र आहेत. अनुत्तीर्ण विद्यार्थ्यांनासुद्धा कौशल्य प्रशिक्षण मिळून त्यांनी स्वत:च्या पायावर उभे राहावे यासाठी त्यांना ११ अभ्यासक्रमांमध्ये संधी देण्यात येत आहे. राज्यात 'डीव्हीईटी'च्या पुणे विभागात प्रवेशासाठी सर्वाधिक ३१ हजार १९६ जागा उपलब्ध आहेत. त्यापैकी ६१ सरकारी आयटीआयमध्ये १७ हजार ३१२, तर १२९ खासगी आयटीआयमध्ये १३ हजार ८८४ जागा उपलब्ध आहेत. पुणे शहरातील औंध आयटीआयमध्ये प्रवेश घेण्यासाठी विद्यार्थ्यांची पहिली पसंती असते. मात्र, यंदाची परिस्थिती पाहता औंध आयटीआयमध्ये जागा रिक्त राहण्याची शक्यता आहे. सरकारी आयटीआय : ४१७ खासगी आयटीआय : ५५० एकूण जागा : एक लाख ४९ हजार २९६ गेल्या वर्षी नोंदणी केलेले विद्यार्थी : ३,३२,२१८ यंदा नोंदणी केलेले विद्यार्थी : १,१७,३०६ (१५ जुलै ते ४ ऑगस्टपर्यंत)

from Career News in Marathi: Career News, मराठी Career बातम्या | Maharashtra Times https://ift.tt/3lD97bi
via IFTTT