School Reopen: दिल्लीतील शाळा १४ निर्देश पाळून सुरु होणार, जाणून घ्या

Delhi School Reopening Rules: दिल्लीमध्ये १ सप्टेंबरपासून नववी ते बारावीसाठी शाळा, कॉलेज, विद्यापीठ आणि कोचिंग क्लासेस सुरु होणार आहेत. दिल्ली डिसास्टर मॅनेजमेंट अथोरिटीने यासंदर्भात निर्देश जाहीर केले आहेत. यासाठी डीडीएमएच्या निर्णयानंतर दिल्लीचे मुख्यमंत्री अरविंद केजरीवाल यांनी ट्विट केले होते. कोरोनाच्या घटत्या केसेस पाहता मुलांच्या शिक्षणाचे नुकसान टाळण्यासाठी संपूर्ण खबरदारी घेऊन हळूहळू दिल्लीत शाळा उघडल्या जात आहेत. आपल्याला जीवन पुन्हा रुळावर आणावे लागेल आणि मुलांचे आरोग्य आणि शिक्षण या दोन्ही गोष्टींची काळजी घ्यावी लागेल असे ते म्हणाले. १४ निर्देशांचे पालन करावे लागणार १)शाळेत येणारे सर्व शिक्षक आणि कर्मचाऱ्यांचे लसीकरण पूर्ण होणे गरजेचे आहे. नसतील तर त्याला प्राधान्य द्यावे लागेल. याची शाळेच्या मुख्याध्यापकांनी खात्री करावी २)वर्ग खोलीतील आसन क्षमतेच्या जास्तीत जास्त ५० टक्के मुले एकावेळी वर्गात उपस्थित राहतील. ३) प्रत्येक वर्गात सोशल डिस्टन्सिंगसाठी वेगवेगळा फॉर्म्युला असेल. ४)सकाळ आणि संध्याकाळच्या शिफ्ट शाळा सुरु राहतील. दोन शिफ्टमध्ये किमान एक तासाचे अंतर असेल. ५)मुलांना त्यांचा डबा, पुस्तके आणि इतर स्टेशनरी वस्तू एकमेकांशी शेअर करू नका असे सांगण्यात आले आहे. ६) एका वेळी खूप गर्दी जमा होऊ नये म्हणून जेवणाची सुट्टी या वेगळ्या वेळी खुल्या भागात ठेवण्याचा सल्ला दिला गेलाय. ७) एक आसन वगळून दुसरे अशी आसन व्यवस्था करायला हवी ८)मुलांना शाळेत जाण्यासाठी पालकांची परवानगी आवश्यक आहे. जर पालकांना आपल्या मुलाला शाळेत पाठवायचे नसेल तर त्याला तसे करण्यास भाग पाडले जाणार नाही. ९)कंटेनमेंट झोनमध्ये राहणारे शिक्षक, कर्मचारी किंवा विद्यार्थ्यांना शाळेत येऊ दिले जाणार नाही. १०)शाळेच्या आवारात अलगीकरणाची खोली तयार करणे बंधनकारक आहे, आवश्यक असल्यास कोणत्याही मुलाला किंवा कर्मचाऱ्यांना तिथे ठेवता येईल. ११) शाळेचा कॉमन एरिआ नियमितपणे स्वच्छ केला जावा. स्वच्छतागृहांमध्ये साबण आणि पाणी मुबलक असावे. तसेच शाळेच्या परिसरात थर्मल स्कॅनर, सॅनिटायझर आणि मास्क इत्यादी उपलब्ध असावे. १२)एंट्री गेटवर थर्मल स्कॅनर अनिवार्य असेल. मुलांसोबत कर्मचाऱ्यांसाठीही मास्क आवश्यक असतील. याशिवाय, गेटवरच मुलांचे हात स्वच्छ केले जातील. १३)शाळा प्रमुखांना SMC सदस्यांसह बैठक आयोजित करण्यास सांगितले गेले आहे. कोविड प्रोटोकॉल योजना आणि थर्मल स्कॅनर, साबण आणि सॅनिटायझर इ. उपलब्ध करुन देण्यास सांगितले आहे. १४)ज्या शाळांमध्ये लसीकरण आणि रेशन वितरणाचे काम सुरू आहे, तो भाग शाळेतील शैक्षणिक उपक्रमाच्या ठिकाणापासून वेगळा ठेवला जाईल. यासाठी स्वतंत्र एंट्री-एक्झिट पॉइंट बनवले जातील आणि सिविल डिफेन्स स्टाफ तैनात केले जातील. अलीकडेच गुजरात सरकारनेही २ सप्टेंबर २०२१ पासून इयत्ता सहावी ते आठवीच्या शाळा पुन्हा उघडण्याची घोषणा केली आहे. सरकारने शाळांना ५० टक्के क्षमतेने वर्ग आयोजित करण्याचे निर्देश दिले आहेत. दुसरीकडे कोविड -१९ च्या तिसऱ्या लाटेचा धोका लक्षात घेता हिमाचल प्रदेश सरकारने ४ सप्टेंबरपर्यंत शाळा बंद करण्याचा निर्णय घेतला होता. शिमला येथे मुख्यमंत्री जय राम ठाकूर यांच्या अध्यक्षतेखाली झालेल्या मंत्रिमंडळाच्या बैठकीत हा निर्णय घेण्यात आला. मात्र, यापूर्वी २८ ऑगस्टपर्यंत शाळा बंद ठेवण्याचे आदेश देण्यात आले होते. यानंतर, आता वेळ मर्यादा आणखी वाढवण्यात आली आहे.

from Career News in Marathi: Career News, मराठी Career बातम्या | Maharashtra Times https://ift.tt/3mH3jOv
via IFTTT